رحمان ملک کا کہنا ہے کہ کشمیر میں مودی ظلم و ستم کے پہاڑ توڑ رہا ہے۔

تفصیلات کے مطابق سابق وزیرِداخلہ رحمان ملک نے آئی آر آر کے سیمینار میں “پاکستان کی داخلی سلامتی کی صورتحال اور اسکی بین الاقوامی اہمیت” کے موضوع پر خطاب کرتے ہوئے کہا ہے کہ علاقائی، جغرافیائی و سیاسی حوالے سے پاکستان دنیا کا ایک اہم ملک ہے، ایٹمی طاقت ہونے کے ناطے سے پاکستان کو پوری دنیا اور اسلامی ممالک میں اہم مقام حاصل ہے۔

ان کا کہنا ہے کہ کسی بھی ملک کی ترقی کا انحصار امن و امان کی صورتحال پر منحصر ہے، کسی بھی ملک کی ترقی امن و امان کی بہتر صورتحال کے بغیر ممکن نہیں ہے، پاکستان کے اندرونی سیکورٹی صورتحال خراب کرنے میں بھارت کا ہاتھ ہے، بھارت بلوچستان میں ریاست کیخلاف کاروائیوں میں ملوث ہے، بھارت ہر بین الالقوامی فورم پر پاکستان مخالف پروپیگنڈہ کر رہا ہے۔

رحمان ملک نے کہا ہے کہ دنیا کو معلوم ہے کہ طالبان، القاعدہ اور داعش کو کس نے بنایا ہے، پاکستان نے دھشتگردی کیخلاف جنگ میں سب سے زیادہ جانی و مالی نقصانات اٹھائےہیں۔

انھوں نے کہا ہے کہ اقوام متحدہ و دیگر بین الالقوامی تنظیموں پر طاقتور ممالک کی اجاراداری ہے، پاکستان کو اس وقت ہاِئبرڈ وارسمیت دیگر چیلنجز  کا سامناہے، کشمیر میں مودی ظلم و ستم کے پہاڑ توڑ رہا ہے، بھارتی افواج نے 11,042 کشمیری عورتوں کا گینگ ریپ اور ہزاروں جوانوں کو بینائی سے محروم کیا ہے، مودی کے مظالم پر اقوام متحدہ خاموش تماشائی بنا ہوا ہے۔

رحمان ملک کا مزہد کہنا ہے کہ بھارت افغانستان میں امن و امان کے حق میں نہیں ہے، بھارت افغانستان کو پاکستان کیخلاف استعمال کرنا چاہتا ہے، افغانستان میں امن و امان کا مطلب پرامن پاکستان ہے، پاکستان نے ہمیشہ پرامن اور ترقی یافتہ افغانستان کےلئے کوششیں کئی ہیں، عالمی طاقتوں سے گزارش ہے کہ افغانستان میں امن کے کئے کردار ادا کرے۔