وفاقی وزیر اطلاعات فواد چوہدری نے کہا ہے کہ حکومت سندھ اپنے معاملات پر نظر ڈالے اور گورننس بہتر کرے۔

تفصیلات کے مطابق وزیر اعظم کی زیر صدارت کابینہ اجلاس کے فیصلوں پر فواد چوہدری نے میڈیا بریفنگ کے دوران وفاقی وزیر اطلاعات فواد چوہدری نے کہا کہ سندھ حکومت اپنے گریبان میں جھانکے، کراچی اور حیدر آباد ویکسینیشن میں سب سے پیچھے ہیں۔

وفاقی وزیر اطلاعات نے کہا کہ کورونا وبا کی لہر سے متعلق سندھ کے حوالے سے تشویش پائی جاتی ہے، وفاقی حکومت کو اختیار ہے کہ وہ صوبوں کو گورننس کی طرف توجہ دلائے۔

فواد چوہدری نے اپوزیشن سے متعلق بات کرتے ہوئے کہا کہ ملک سے باہر بیٹھے مفرور افراد کو پارٹی کی قیادت کرنے کا کوئی حق نہیں۔

وفاقی وزیر اطلاعات کا کہنا تھا کہ شہباز شریف کا بات کرنے سے متعلق بیان خوش آئند ہے لیکن نواز شریف، فضل الرحمان اور مریم نواز ایوان کا حصہ نہیں، یہ تینوں لوگ نظام بگاڑنا چاہتے ہیں۔

فواد چوہدری کا یہ بھی کہنا تھا کہ 23 قیدی سعودی عرب سے پاکستان پہنچے ہیں، دنیا بھر سے سیکڑوں قیدیوں کو پاکستان لایا گیا ہے۔

وفاقی وزیر اطلاعات فواد چوہدری کا مزید کہنا تھا کہ وزیراعظم بیرون ملک پاکستانیوں کے لیے درد رکھتے ہیں جبکہ سعودی عرب میں سفارتی عملے کو لیبر کا خیال نہ کرنے پر واپس بلایا گیا، بیرون ملک ہر پاکستانی پاکستان کا سفیر ہے۔