وزیراعظم آزاد کشمیر سردار عبدالقیوم نیازی نے کہا کہ مقبوضہ کشمیر کی عوام انسانی تاریخ کے بدترین مظالم کا سامنا کررہی ہے۔

تفصیلات کے مطابق وزیراعظم آزاد کشمیر سردار عبدالقیوم نیازی نے یوم سیاہ کے حوالے سے پیغام دیتے ہوئے کہا کہ آج ہندوستان کے یوم آزادی کو دنیا بھر میں مقیم کشمیری یوم سیاہ کے طور پر منارہے ہیں۔

انہوں نے کہا کہ ہندوستان نے کشمیریوں کی آزادی کو گزشتہ سات دھائیوں سے سلب کر رکھا ہے، ظلم و جبر سے کشمیریوں کی تحریک آزادی کو دبانے کی کوشش کرتا چلا آرہا ہے۔

عبدالقیوم نیازی نے کہا کہ مقبوضہ جموں و کشمیر کی عوام اس وقت ہندوستانی فوج کے محاصرے میں ہیں، ہندوستان ایک انتہا پسند ریاست ہے جو مقبوضہ کشمیر میں انسانی حقوق کی سنگین خلاف ورزیوں میں ملوث ہے، ہندوستان کے ہاتھ کشمیریوں کے مقدس خون سے رنگے ہوئے ہیں، ہندوستان کا یوم آزادی ہمارے لیے یوم سیاہ ہے۔

انہوں نے کہا کہ کشمیریوں نے اپنے حق کیلئے لاکھوں جانوں کی قربانیاں دی ہیں اور آئے روز قربانیوں کی داستان رقم کررہے ہیں، کشمیریوں کی قربانیاں رائیگاں نہیں جائیں گی، مسئلہ کشمیر کو اقوام متحدہ کی قراردادوں کے مطابق حل کروانا ناگزیر ہے۔

عبدالقیوم نیازی نے کہا کہ جنوبی ایشیا میں پائیدار امن اور سلامتی کے لئے مسئلہ کشمیر کا پرامن حل ناگزیر ہے، کشمیر کے سفیر اور وکیل وزیراعظم عمران خان کی محنت سے اس وقت اقوام عالم میں کشمیریوں کے حق میں آوازیں بلند ہور ہی ہیں۔

وزیراعظم آزاد کشمیر سردار عبدالقیوم نیازی نے مزید کہا کہ وہ دن دور نہیں جب مقبوضہ کشمیر بھی بھارت کے غیر آئینی اور غیر اخلاقی جابرانہ قبضے سے نجات حاصل کرے گا۔