پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف نے کہا ہے کہ بھارت انسانی حقوق کی سنگین پامالیوں پر عالمی قانون اور انسانیت کا مجرم ہے۔

تفصیلات کے مطابق پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف نے بانڈی پورہ میں کشمیری نوجوان کو شہید کرنے کی شدید مذمت کرتے ہوئے کہا کہ 5 اگست 2019 کے بعد سے بالخصوص مقبوضہ جموں و کشمیر میں بھارتی انسانیت سوز مظالم میں کئی گنا اضافہ ہوچکا ہے۔

پاکستان مسلم لیگ (ن) کے صدر نے کہا کہ اگست کے مہینے میں بھارت سلامتی کونسل کا صدر تو بن گیا ہے لیکن مقبوضہ جموں و کشمیر کے عوام کے بنیادی حقوق کی خلاف ورزیوں کا سنگین سلسلہ جاری ہے۔

قومی اسمبلی میں اپوزیشن لیڈر نے یہ بھی کہا کہ بھارت انسانی حقوق کی سنگین پامالیوں پر عالمی قانون اور انسانیت کا مجرم ہے، مہذب دنیا بھارت سے سلامتی کونسل کی جموں و کشمیر پر قراردادوں پر عملدرآمد کا تقاضا کرے۔

شہباز شریف کا کہنا تھا کہ مقبوضہ جموں کشمیر کے بہادر اور آزادی پسند عوام نے غلامی قبول کی ہے نہ مستقبل میں کریں گے، شکست بھارت کا مقدر ہے۔

پاکستان مسلم لیگ (ن) کے صدر اور قومی اسمبلی میں اپوزیشن لیڈر شہباز شریف کا مزید کہنا تھا کہ اہل کشمیر کی قربانیاں رنگ لائیں گی، ان کے حوصلے، عزم اور ثابت قدمی کو پوری انسانیت سلام پیش کرتی ہے، اللہ تعالی شہداء کے درجات بلند فرمائے اور لواحقین کو صبر جمیل دے۔ آمین