سارہ اسلم کا کہنا ہے کہ ویکسینیشن ہی کورونا وائرس  کے  خلاف موثر علاج ہے۔

تفصیلات کے مطابق محکمہ پرائمری اینڈ سکینڈری ہیلتھ کی سیکرٹری نے کہا ہے کہ پنجاب میں کورونا وائرس کے کیسز میں اضافہ ہورہا ہے، کورونا کیسز میں اضافہ کے  پیشِ نظر مختلف سیکٹرز کے  اسپیشل ایس او پیز جاری کر دیے گئے ہیں، تمام شہری خاص طور پر کورونا کی  مکمل احتیاط ملحوظ خاطر رکھیں۔

ان کا کہنا ہے کہ صرف اور صرف  ویکسینیشن ہی کورونا وائرس  کے  خلاف  واحد اور موثر علاج ہے، گزشتہ 24 گھنٹوں کے دوران صوبہ بھر سے 934 نئے کیسز رپورٹ ہوئے ہیں جس سے صوبہ بھر میں کرونا کے کیسز کی ٹوٹل تعداد 359,321 ہو گئی ہے، اب تک صوبہ بھر میں 333,882 مریض مکمل طور پر صحت یاب ہو چکے ہیں جبکہ صوبہ بھر میں ایکٹیو کیسز کی تعداد 14,337 ہو گئی ہے۔

سارہ اسلم نے بتایا ہے کہ گزشتہ روز لاہور میں 5 ہلاکت سمیت صوبہ بھر میں ٹوٹل 21 اموات رپورٹ تھیں، گزشتہ 24 گھنٹوں کے دوران 20,569 ٹیسٹ کئے گئے ہیں، صوبہ بھر میں اب تک مجموعی طور پر 6,235,212 ٹیسٹ کیے جا چکے ہیں، گزشتہ روز صوبہ بھر کے تمام شہروں میں کرونا کی مجموعی مثبت شرح 4.5 ریکارڈ کی گئی ہے۔

انھوں نے مزید کہا ہے کہ شہری کورونا کے خلاف خصوصی حفاظتی تدابیر اختیار کرکے خود کو محفوظ بنائیں، بلاضرورت گھر سے باہر نکلنے اور پر ہجوم اجتماعات  سے مکمل اجتناب کریں، سماجی فاصلہ برقرار رکھیں اور ماسک کا استعمال لازمی کریں۔