وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا کہ سندھ پرعمران خان کا اتنا ہی حق ہے جتنا پنجاب پر ہے۔

تفصیلات کے مطابق وزیر اعظم کے معاون خصوصی برائے سیاسی ابلاغ ڈاکٹر شہباز گل نے میڈیا سے گفتگو کرتے ہوئے کہا کہ میاں شہباز شریف صاحب سے رپورٹ مانگی جارہی ہے مگر ڈاکٹر نہیں مل رہا، میاں صاحب کو اب وطن واپس آنا پڑے گا، گڈ کاپ اور بیڈ کاپ کا ڈرامہ ہمارے ساتھ نہیں چلے گا۔

انہوں نے کہا کہ ان کوعمران خان کی دی گئی دوائی نگلنی پڑے گی، میاں صاحب بیماری کا جھوٹ بول کر باہر گئے، نوازشریف اورشہبازشریف دونوں چورہیں، نوازشریف اور شہبازشریف کا ایک ہی مقصد ہے پیسہ بچانا۔

شہباز گل نے کہا کہ 14 سال سے لوٹ مار کرنے والوں کو ایڈمنسٹریٹر لگانے کا اب احساس ہوا، یہ سمجھتے ہیں خان کے آنے سے پہلے جتنی کرپشن کرنی ہے کر لو، سندھ میں 14 سال سے لوٹ مار جاری ہے۔

انہوں نے کہا کہ وزیراعظم عمران خان نے کشمیر کے بعد سندھ کے رخ کا اعلان کیا، وزیراعظم کےاعلان کے بعد سندھ میں ہلچل مچ گئی ہے، سندھ میں وزارت اعلیٰ مراد شاہ سے لے کر سراج درانی کو دی جارہی ہے، پیپلزپارٹی جانتی ہے خان کے آنے کے بعد احتساب ہوگا۔

شہباز گل کا کہنا ہے کہ ایڈمنسٹریٹرکے نام پر لوٹ مارکی نئی دکان کھلی ہے، مرتضیٰ وہاب کو ایڈمنسٹریٹر لگانے کا مقصد مزید لوٹ مار کرنا ہے، پی ٹی آئی کا پرچم اب سندھ میں بھی لہرائے گا، ہماری حکومت میں 2 ہزار ارب سے زائد پی پی لے چکی ہے، پیپلزپارٹی نے پیسے عوام پر خرچ کرنے کے بجائے لوٹ مار کی۔

وزیر اعظم کے معاون خصوصی برائے سیاسی ابلاغ ڈاکٹر شہباز گل نے مزید کہا کہ مریم ہماری باجی ہیں لیکن ہر بندے کے پیچھے بندہ لگایا ہوا ہے، باجی کو جب کسی سے کام لینا ہوتا ہے تو ویڈیو نکال دیتی ہیں، پاکستان جب سے بنا مہنگائی تب سے ہو رہی ہے۔