پنجاب پرائمری اینڈ سیکنڈری ہیلتھ کی سیکرٹری سارہ اسلم  نے کہا ہے کہ ویکسینیشن ہی کورونا وائرس  کے  خلاف  واحد اور موثر علاج ہے۔

تفصیلات کے مطابق پنجاب پرائمری اینڈ سیکنڈری ہیلتھ کی سیکرٹری سارہ اسلم  نے کہا ہے کہ پنجاب میں کورونا وائرس کے کیسز میں اضافہ جاری ہے، کورونا کیسز میں اضافے کے  پیشِ نظر مختلف سیکٹرز کے  اسپیشل ایس او پیز جاری کر دیے ہیں۔

ان کا کہنا ہے کہ تمام شہری خاص طور پر کورونا کی  مکمل احتیاط ملحوظ خاطر رکھیں، 18 سال سے زیادہ عمر  کے تمام افراد کا فوری طور پر ویکسین لگوانا ناگزیر ہے، گزشتہ 24 گھنٹوں کے دوران صوبہ بھر سے  1,488 نئے کیسز رپورٹ ہوئے ہیں۔

 پنجاب پرائمری اینڈ سیکنڈری ہیلتھ کی سیکرٹری سارہ اسلم  کا کہنا ہے کہ صوبہ بھر میں کرونا کے کیسز کی ٹوٹل تعداد 382,333 ہو گئی ہے، اب تک صوبہ بھر میں 346,680 مریض مکمل طور پر صحت یاب ہو چکے ہیں، صوبہ بھر میں ایکٹیو کیسز کی تعداد 24,050 ہو گئی ہے جس سے صوبہ بھر کے تمام شہروں میں کرونا کی مجموعی مثبت شرح 7.0 ریکارڈ کی گئی ہے۔

انھوں نے بتایا ہے کہ شہری کورونا کے خلاف خصوصی حفاظتی تدابیر اختیار کرکے خود کو محفوظ بنائیں، بلاضرورت گھر سے باہر نکلنے اور پر ہجوم اجتماعات  سے مکمل اجتناب کریں، سماجی فاصلہ برقرار رکھیں اور ماسک کا استعمال لازمی کریں۔