مسلم لیگ ضیاء کے صدر اعجاز الحق نے کہا ہے کہ طالبان کی جانب سے افغانستان میں عام معافی کا اعلان بڑا فیصلہ ہے۔

تفصیلات کے مطابق مسلم لیگ ضیاء کے صدر اعجاز الحق نے میڈیا سے گفتگو کرتےہوئے کہا ہے کہ حکومت 3 سالہ کارکردگی کے ڈنکے تو بجا رہی ہے مگر مہنگائی ، بےروزگاری، امن وامان کے حوالہ سے حکومت کی کارکردگی اچھی نہیں رہی ہے،ہماری خواہش ہے حکومت مہنگائی بے روزگاری اور لاقانونیت کے خلاف جنگ کرے۔

ان کا کہنا ہے کہ آج جو لوگ موجودہ حکومت کے خلاف سلیکٹیڈ کا نعرہ لگا رہے ہیں وہ بھی تو اسی راستہ سے ہی اقتدار میں آئے ہیں، اب بھی انکی یہی کوشش ہے کہ انہیں سیلکٹ کیا جائے جس کی واضح مثال شہباز شریف کی سرگرمیاں اور کوششیں ہیں۔

انھوں نے کہا ہے کہ افغانستان کے سابق نیشنل سیکورٹی کونسل کے ترجمان سے نواز شریف کی ملاقات کہاں کی حب الوطنی ہے، پی ڈی ایم سے پی پی پی مائنس ہو چکی مسلم لیگ ن کے چند دنوں میں مائنس ہونے کا امکان ہے، جلد مولانا فضل الرحمٰن کے سوا کوئی بڑی پارٹی پی ڈی ایم کا حصہ نہیں رہے گی۔

مسلم لیگ ضیاء کے صدر اعجاز الحق نےمزید کہا ہے کہ حکومت پاکستان کو چاہئیے کہ وہ افغانستان میں طالبان کو کام کرنے دینے کے حوالہ سے دنیا کو قائل کرے، طالبان کی جانب سے افغانستان میں عام معافی کا اعلان بڑا فیصلہ ہے، امریکی انخلاء کے بعد طالبان آزادانہ حکومت چلا سکیں گے، افغانستان میں مزید دھماکے ہونے کی اطلاعات دینے والے جانتے ہیں کہ ان دھماکوں کے پیچھے کون ہے، اگر افغانستان میں بیرونی مداخلت نہ ھوئی تو افغانستان پرامن ملک ہوگا۔