سابق کپتان رمیز راجہ کو چیئرمین کرکٹ بورڈ کی کرسی پر بیٹھنے کے بعد کئی چیلننز کا سامنا ہوگا۔

تفصیلات کے مطابق پاکستان کرکٹ بورڈ کے چیئرمین کی کرسی سنبھالنے کے بعد رمیز راجہ کو نیوزی لینڈ ٹیم کی میزبانی کے ساتھ ٹی ٹونٹی ورلڈ کپ کے لیے ایک مضبوط پاکستانی ٹیم کا انتخاب اہم ایشو ہے اور یہ فیصلہ بھی کرنا ہوگا کہ ہیڈ کوچ مصباح الحق، بالنگ کوچ وقار یونس اور ان کے ساتھیوں پر مشتمل ٹیم مینجمنٹ کے ساتھ ہی میگا ایونٹ میں جانا ہے یا پھر اس سیٹ اپ میں تبدیلی لانا ہوگی۔

پی سی بی کے متوقع نئے چیئرمین نے پرانے ساتھی کرکٹرز سے مشاورت بھی شروع کردی ہے ، ایک سابق کرکٹر نے نام ظاہر نہ کرنے کی شرط پر بتایا کہ رمیز راجہ اچانک اور فوری تبدیلیوں سے گریز کرنے کی پالیسی اپنانے کو ترجیح دیں گے۔

ذرائع کا کہنا ہے کہ  قومی ٹیم کے انتخاب سے پہلے رمیز راجہ مینجمنٹ اور چیف سلیکٹر محمد وسیم سے ملاقاتیں کریں گے، جس میں وہ کوچنگ اور ٹیم سلیکشن کے حوالے سے اپنی رائے دیں گے ۔

ذرائع کے مطابق ٹیم مینجمنٹ اور پی سی بی سیٹ اپ میں تبدیلیاں ورلڈ کپ کے بعد کی جائیں گی،چیف سلیکٹر محمد وسیم کی جگہ کسی سینئر کرکٹر کو یہ ذمہ داری سونپی جائے گی۔

ذرائع کا کہنا ہے کہ نیشنل ہائی پرفارمنس سنٹر میں ڈائریکٹر اکیڈمیز ندیم خان اور کوچنگ سٹاف میں بھی ردوبدل دیکھنے کو ملے گا ، نیشنل ہائی پرفارمنس سینٹر کے ساتھ پی سی بی میں بھی چند پرانے چہروں کی واپسی ہوسکتی ہے۔

ذرائع کا مزید کہنا تھا کہ  سابق چیف آپریٹنگ آفیسر سبحان احمد کی بھی کرکٹ بورڈ میں اہم عہدے پر واپسی ہوسکتی ہے۔