وزیراعلیٰ بلوچستان جام کمال خان نے کہا کہ بلوچستان اسمبلی پر حالیہ حملے کے واقعے کی پوری ذمہ داری اسپیکر پر بنتی ہے۔

تفصیلات کے مطابق وزیراعلیٰ بلوچستان جام کمال خان نے اسپیکر عبدالقدوس بزنجو کو تگڑا جواب دیتے ہوئے کہا کہ قدوس بزنجو صاحب سب سے پہلے اپنی ذمہ داری ایک اسپیکر کی حیثیت سے ٹھیک طرح سے نبھائیں۔

انہوں نے کہا موصوف اپنے حلقے پر توجہ دیں جہاں وہ تین سالوں میں ایک بار بھی وہاں نہیں گئے، جو شخص نہ اپنا حلقہ چلا سکا اور نہ ہی اسمبلی، وہ اپنے بچکانہ مشورے اپنے پاس رکھیں اور کام پر توجہ دے۔

جام کمال خان نے کہا کہ آواران کو تباہی تک لے جانے والا شخص چاہتا ہے کہ صوبے کا حال بھی ایسا ہی کردے، میں ایک غیر سنجیدہ شخص کے ہاتھوں آواران کو اس طرح بے یار و مددگار نہیں چھوڑ سکتا، کوئی لوٹ مار کا بازار گرم ہو، اسکیمات تباہ ہو ہم کچھ نہ کریں، ایسا نہیں ہوسکتا، حکومت نے پہلے بھی ایکشن لیا ہے اور اب بھی لے گی۔

وزیراعلیٰ بلوچستان کا کہنا ہے کہ پارٹی الحمد اللہ بہت بہتر ہے، جو بھی نقصان ابھی تک ہوا ہے اس میں قدوس بزنجو کی سازشوں کا ایک بڑا ہاتھ ہے، جو شخص پہلے دن سے پارٹی کو توڑنے کی نیت سے آیا ہو وہ ہمیں پارٹی کا درس نہ دے۔

وزیراعلیٰ بلوچستان جام کمال خان نے مزید کہا کہ برادشت کی حد ہوگئی ہے قدوس بزنجو کے بار بار کے ڈرامے سب پرعیاں ہوگئے ہیں۔