صدر مملکت ڈاکٹر عارف علوی نے کہا ہے کہ ادارے قوم کی تقدیر کی تشکیل میں مرکزی کردار ادا کرتے ہیں۔

تفصیلات کے مطابق صدر عارف علوی کی زیر صدارت انسداد منشیات اور خصوصی افراد کی فلاح کیلئے وائس چانسلر ز کمیٹی کا اجلاس  ہوا جس میں منشیات اور تمباکو کے غلط استعمال کی پالیسی کو صدر پاکستان کی ہدایات کی روشنی میں حتمی شکل دی گئی۔

ڈاکٹر عارف علوی کا کہنا تھا کہ ملک کے اعلیٰ تعلیمی اداروں کو منشیات اور تمباکو کے استعمال سے پاک بنانے کی ضرورت ہے ، یونیورسٹیوں کی انتظامیہ متعلقہ اداروں میں منشیات کی روک تھام پر توجہ دیں ۔

ان کا کہنا تھا کہ انسداد منشیات اور تمباکو پالیسی اور بہبود خصوصی طلباء پالیسیوں کو جلد از جلد نافذ کرنے کی ضرورت ہے ۔

اجلاس میں صدر مملکت کو بریفنگ دیتے ہوئے کہا کہ  قائداعظم یونیورسٹی اقوام متحدہ کے دفتر برائے منشیات اور جرائم کے ساتھ مل کر مشیروں اور ماہر نفسیات کو تربیت دے گی۔

وزارت انسداد منشیات نے منشیات کے استعمال کی روک تھام، علاج کے بارے میں معلومات فراہم کرنے کیلئے موبائل ایپ ’’ زندگی ‘‘ تیار کی ہے ۔

 اجلاس میں  مزید کہا گیا کہ  خصوصی طلباء کو تعلیمی، تکنیکی اداروں اور یونیورسٹیوں میں داخلہ لینے کے لیے 10 سال تک عمر میں نرمی فراہم کی جائے گی، خصوصی طلباء کو اعلیٰ تعلیم کے لیے ٹیوشن فیس ، ہاسٹل فیس اور یوٹیلیٹی بل کی چھوٹ دی جائے گی۔