او آئی سی کے انسانی حقوق کمیشن کے وفد کی وزارتِ خارجہ میں وزیرخارجہ مخدوم شاہ محمود قریشی سے ملاقات ہوئی ہے۔

ملاقات میں وزیرخارجہ نے کہا کہ آج 5 اگست کے دن آپ کی آمد ہمارے لیے خصوصی اہمیت کی حامل ہے، آج پورے ملک میں مقبوضہ جموں و کشمیر میں بسنے والے کشمیریوں کے ساتھ اظہار یکجہتی اور بھارت کے 5 اگست 2019 کے یک-طرفہ اور غیر آئینی اقدامات کے خلاف احتجاج ہو رہا ہے۔

شاہ محمود قریشی نے یہ بھی کہا کہ مقبوضہ جموں و کشمیر میں بھارتی مظالم اور انسانی حقوق کی سنگین خلاف ورزیوں کا سلسلہ تواتر سے جاری ہے، نہتے کشمیریوں کو بنیادی انسانی حقوق سے محروم رکھا جا رہا ہے۔

وزیرخارجہ کا کہنا تھا کہ خواتین کی بے حرمتی معمول بن چکا ہے، بھارت سرکار ، مقبوضہ جموں و کشمیر میں جغرافیائی تناسب کو تبدیل کرنے کیلئے، بین الاقوامی قوانین سے رو گردانی کرتے ہوئے، اب تک 3.8 ملین ڈومیسائل سرٹیفکیٹ جاری کر چکی ہے۔

شاہ محمود قریشی کا یہ بھی کہنا تھا کہ بھارت کی جانب سے کشمیر پریمیر لیگ جیسے ایونٹ کو متنازعہ بنانے کی کوشش کی گئی، ہم بھارت سمیت خطے میں ہمسایہ ممالک کے ساتھ پرامن طریقے سے رہنے کے متمنی ہیں۔

وزیرخارجہ نے کہا کہ بھارت نے اپنے یکطرفہ اقدامات سے خطے کے امن کو خطرات سے دو چار کیا ، اس بگاڑ کو سلجھانے کی ذمہ داری بھی بھارت سرکار پر عائد ہوتی ہے

شاہ محمود قریشی نے یہ بھی کہا کہ بھارت کی کشمیر پالیسی نے کشمیریوں کو بھارت سرکار سے مزید متنفر کیا ہے۔

وزیرخارجہ کا کہنا تھا کہ آج ہندوستان کی کشمیر پالیسی کے خلاف آوازیں ہندوستان کے اندر سے آٹھ رہی ہیں، میں اس موقع پر سابق صدر جنرل اسمبلی والکن بوذکر کا ذکر کرنا ضروری سمجھتا ہوں

شاہ محمود قریشی کا یہ بھی کہنا تھا کہ فلسطین اور کشمیر کے معاملے پر جناب والکن بوذکر کی خدمات قابل تحسین ہیں، او آئی سی کی وزرائے خارجہ کونسل کا اگلا اجلاس اسلام آباد میں منعقد ہوگا۔

وزیرخارجہ مخدوم شاہ محمود قریشی کا مزید کہنا تھا کہ ہم مقبوضہ جموں و کشمیر میں جاری انسانی حقوق کی سنگین خلاف ورزیوں کا معاملہ، او آئی سی انسانی حقوق کمیشن کی مرتب کردہ رپورٹس کے ہمراہ او آئی سی وزرائے خارجہ کونسل کے آئندہ اجلاس میں رکھیں گے۔

ملاقات میں سیکرٹری خارجہ سہیل محمود ،اسپیشل سیکرٹری رضا بشر تارڑ اور وزارتِ خارجہ کے سینئر افسران نے شرکت کی۔