وزیر مملکت برائے پارلیمانی امور علی محمد خان نے کہا کہ کوئی بھی پاکستانی پاکستان کے کسی بھی علاقے میں زمین خرید سکتا ہے۔

تفصیلات کے مطابق وزیر مملکت برائے پارلیمانی امور علی محمد خان نے قومی اسمبلی کے اجلاس میں کہا کہ 1965 اور 1971 کی جنگ میں کچھ زمینیں حکومت نے اپنے قبضے میں لیں، تھر پارکر، مٹھی، چھاچھرو، ناگر پارکر اور جیکب آباد میں متروکہ دشمن املاک ہیں۔

انہوں نے کہا کہ 2018 سے ہم نے ان زمینوں کے حوالے سے اقدامات کیے، قبضہ چھڑانے کے بعد فیصلہ کریں گے کہ ان زمینوں کو لیز پر دینا ہے یا نہیں۔

علی محمد خان نے کہا کہ وزارت مواصلات اس معاملے پر عدالتی کیسز ختم کروانے کیلئے کام کر رہی ہے، 18ویں کے فائدوں کے علاوہ نقصانات بھی سامنے آئے، 18ویں میں جو سقم ہیں ان پر بات کرنی چاہیے۔

وزیر مملکت برائے پارلیمانی امور کا کہنا تھا کہ سندھ متروکہ دشمن املاک پر سندھ حکومت نے بھی کمیٹی بنائی ہے، یہ معاملہ کمیٹی کو بھجوا دیں وہاں اس کا جائزہ لے لیتے ہیں۔

علی محمد خان نے کہا کہ تاریخ میں بہت سی ناانصافیاں ہوئیں، سب مل کر بیٹھیں تو ناانصافیوں کا ازالہ کیا جا سکتا ہے، وفاقی حکومت متروکہ املاک کے حوالے سے اپنی ذمہ داری پوری کرے گی، سندھ کی متروکہ دشمن املاک پر عدالتی کیسز ختم ہونے کے بعد پالیسی بنانی ہوگی۔

وزیر مملکت برائے پارلیمانی امور علی محمد خان نے مزید کہا کہ ہماری اولین ترجیح ان زمینوں سے قبضے چھڑوانا ہے۔