وزیر صحت پنجاب ڈاکٹریاسمین راشد نے کہا ہے کہ بچوں کی صحت کیلئے چائلڈ ہیلتھ یونیورسٹی قائم کی جارہی ہے۔

تفصیلات کے مطابق وزیر صحت پنجاب ڈاکٹر یاسمین راشد نے”بے بی فرینڈلی ہاسپٹل انشی ایٹو“کی لانچنگ تقریب میں خطاب کرتے ہوئے کہا ہے کہ  بے بی فرینڈلی ہاسپٹل انشی ایٹو کا منصوبہ لانچ کرنے والے تمام سٹیک ہولڈرزکومبارکباد دیتی ہوں، یہ منصوبہ لانچ کرنے کا بنیادی مقصد ماؤں اوربچوں کی صحت کو یقینی بنانا ہے۔

ان کا کہنا ہے کہ بچے کی نشونماء اور بیماریوں سے بچاؤ کیلئے ماں کے دودھ کی بہت زیادہ اہمیت ہے، ہمارے معاشرہ میں خواتین کے اندر بچوں کواپنا دودھ پلانے کے اہمیت کواجاگرکرنا انتہائی ضروری ہے، ماں کے دودھ سے بچے کی قوت مدافعت میں بے انتہا اضافہ ہوجاتا ہے۔

انھوں نے کہا ہے کہ بیرون ممالک میں تمام مائیں اپنے بچوں کو خود دودھ پلاتی ہیں، پاکستان میں خواتین میں بچوں کو اپنادودھ پلانے کے رجحان بڑھانے کی ضرورت ہے، سرکاری ہسپتالوں کے اینٹی نیٹل کلینکس پرخواتین کو بریسٹ فیڈنگ کی آگاہی دینے کیلئے ڈیسک قائم کئے جائینگے۔

وزیر صحت پنجاب ڈاکٹر یاسمین راشد نے مزید کہا ہے کہ پنجاب میں ماں اور بچے کی صحت کویقینی بنانے کیلئے حکومت اسٹیٹ آف دی آرٹ مدراینڈ چائلڈ ہسپتال بنارہی ہے، پاکستان نے ہیلتھ سٹریٹیجی میں ماں اور بچے کی صحت کو یقینی بنانے کی ضمانت دی ہے، وزیراعظم عمران خان کے ویژن کے مطابق پنجاب میں ماں اور بچہ کی صحت کو یقینی بنانے کیلئے اقدامات اٹھائے جارہے ہیں، پنجاب کے بچوں کی صحت کو یقینی بنانے کیلئے لاہورمیں چائلڈ ہیلتھ یونیورسٹی کا قیام عمل میں لایاجارہا ہے۔