پاکستان پیپلز پارٹی کے چیئرمین بلاول بھٹو زرداری نے کہا کہ دہشتگردی و انتہا پسندی کا خاتمہ اور رواداری و مساوات کا فروغ ہی پاکستان پیپلز پارٹی کا منشور ہے۔

تفصیلات کے مطابق پاکستان پیپلز پارٹی کے چیئرمین بلاول بھٹو زرداری نے سانحہ کوئٹہ کی پانچویں برسی پر پیغام دیتے ہوئے کہا کہ 8 اگست 2016 کو کوئٹہ میں شہید ہونے والے 56 وکلاء سمیت 73 معصوم شہریوں کو خراج عقیدت پیش کرتا ہوں۔

بلاول بھٹو زرداری نے کہا کہ سانحہ کوئٹہ ملکی تاریخ کے بدترین و تاریک واقعات میں سے ایک ہے، یہ واقعہ بلوچستان کے انتہائی باشعور و متحرک افراد کے خلاف گھناؤنی سازش تھی۔

انہوں نے کہا کہ سانحہ کوئٹہ کا غم اور کرب آج بھی تازہ ہیں، باشعور قومیں اپنے بے گناہ ہم وطنوں کو بے دردی سے قتل کیے جانے کا غم بھولتی ہیں نہ ہی ایسا جرم معاف کرتی ہیں، افسوس سے کہنا پڑتا ہے کہ سانحہ کوئٹہ کے شہیدوں کو قتل ایک بار نہیں بلکہ ہر روز کیا جاتا ہے، ان معصوم پاکستانیوں کا پہلی بار قتل تب ہوا تھا جب یہ المناک واقعہ پیش آیا تھا۔

بلاول بھٹو زرداری نے کہا کہ سانحہ پر بنائی گئی جسٹس فائز عیسیٰ تحقیقاتی کمیشن کی سفارشات پر عملدرآمد نہ کر کے شہیدوں سے ہر روز ناانصافی کی جاتی ہے، دھاندلی کے نتیجے میں آنے والی دائیں بازو کی حکومتیں جسٹس فائز عیسیٰ کمیشن کی سفارشات سمیت نیشنل ایکشن پلان پر عملدرآمد میں رکاوٹ رہی ہیں۔

انہوں نے کہا کہ عوام کی جان و مال کی حفاظت اور دہشتگردی و انتہا پسندی کو حقیقی معنوں میں جڑ سے اکھاڑ پھینکنے کے لئے نیشنل ایکشن پلان پر من و عن عمل کیا جائے، پیپلز پارٹی ملک میں ہر قسم کی دہشتگردی اور کسی بھی شکل میں موجود انتہا پسندی کے خلاف عوامی مزاحمت کا نام ہے۔

پاکستان پیپلز پارٹی کے چیئرمین بلاول بھٹو زرداری نے مزید کہا کہ دہشتگردی کے نتیجے میں اپنے پیاروں کو کھونے کا درد مجھ سے بہتر کوئی نہیں سمجھ سکتا۔