گورنر پنجاب چوہدری محمد سرور نے کہا ہے کہ افغانستان میں امن ہوگا تو خطے میں امن ہوگا۔

تفصیلات کے مطابق گورنر پنجاب چوہدری محمد سرور نے میڈیا سے گفتگو کرتے ہوئے کہا کہ پاکستان افغانستان سمیت کسی ملک کے اندرونی معاملات میں مداخلت نہیں کر رہا، مگر امن کے خلاف بھارت کی سازشیں پوری دنیا دیکھ رہی ہے۔

اس موقع پر گورنر پنجاب نے افغانستان میں امن کے قیام کیلئے عالمی برداری سے بھر پور تعاون کا مطالبہ کرتے ہوئے کہا ہے کہ افغانستان میں امن ناصرف پورے خطے بلکہ دنیا کیلئے بھی فائدہ مند ہوگا۔

چوہدری محمد سرور نے کہا کہ بدقسمتی سے آج بھی بھارت کو امن برداشت نہیں ہو رہا۔ کشمیر میں بھارت بے گناہ اور معصوم کشمیر یوں کیساتھ جو ظلم کر رہا ہے، اس کی دنیا میں کوئی اور مثال نہیں ملتی، وقت آ چکا ہے کہ اقوام متحدہ اپنی قراردادوں پر عمل کرواتے ہوئے مسئلہ کشمیر کو حل کرے کیونکہ خطے میں امن کے مکمل قیام کے لیے مسئلہ کشمیر کا بھی اقوام متحدہ کی قراردادوں کے مطابق حل ہونا بہت ضروری ہے۔

گورنر پنجاب کا کہنا تھا کہ وزیراعظم عمران خان کی قیادت میں حکومت کی تمام تر توجہ ملک میں معاشی استحکام اور ترقی پر مرکوز ہے۔ ہم نے ملک کو معاشی طور پر دیوالیہ ہونے سے بچایا اور آج پوری دنیا پاکستان کی معاشی ترقی کو تسلیم کر رہی ہے۔

چوہدری محمد سرور کا یہ بھی کہنا تھا کہ اب بھی ہماری حکومت کو بہت سے چیلنجز کا سامنا ہے جن سے نمٹنے کیلئے حکومت وسائل استعمال کر رہی ہے اور انشا اللہ عوام سے کیے جانیوالے وعدوں پر مکمل عمل کیا جائے گا اور ملک کو غر بت مہنگائی اور بے روزگاری جیسے مسائل سے بھی مکمل نجات دلائیں گے۔

گورنر پنجاب نے کہا کہ وزیراعلیٰ پنجاب سردار عثمان بزدار کو وزیراعظم عمران خان سمیت پوری پارٹی، اتحادی جماعتوں اور اراکین پنجاب اسمبلی کا مکمل اعتماد حاصل ہے اور پنجاب میں صحت اور تعلیم سمیت دیگر شعبوں میں جو اقدامات موجودہ حکومت کے دورمیں ہوئے ہیں انکی کوئی اور مثال نہیں ملتی۔

محمد سرور نے یہ بھی کہا کہ وفاقی حکومت پہلے دن سے اپوزیشن جماعتوں کو انتخابی اصلاحات پر بات کرنے کی دعوت دے رہی ہے، مگر بدقسمتی سے اپوزیشن انتخابی اصلاحات کے مسودے کو دیکھے بغیر ہی مذاکرات سے انکار کر رہی ہے۔

گورنر پنجاب چوہدری محمد سرور نے مزید کہا کہ الیکٹرونک ووٹنگ مشین کو بھی اپوزیشن جماعتوں نے نہیں دیکھا اور اس کے خلاف بھی تنقید کی جا رہی ہے۔ اپوزیشن کو یہ غیر جمہوری رویہ اختیار کرنے کی بجائے انتخابی اصلاحات پر حکومت سے بات کرنی چاہیے۔ شفاف انتخابات صرف انتخابی اصلاحات سے ہی ممکن ہو سکتے ہیں۔