بارش کا موسم ہو اور مزیدار پکوڑے نہ بنیں ایسا ممکن نہیں، بارش کا موسم پکوڑوں کے بناء تو ادھورا سا لگتا ہے۔

برسات کے موسم میں ہر گھر میں پکوڑے بن رہے ہوتے ہیں کوئی آلو کے تو کوئی پالک کے تو کوئی اپنی مرضی کے ذائقے کے بناتا ہے لیکن بننا لازمی ہیں۔

آج ہم بھی آپ کو چند مختلف قسم کے مزیدار پکوڑوں کو بنانے کا طریقہ بتا رہے ہیں۔

 آلو کے پکوڑے

 بارش میں آلو کے پکوڑے نہ ہوں تو موسم کا مزہ ہی نہیں آتا تو چلیں آج بنائیں ہمارے ساتھ آپ بھی آلو کے مزے دار پکوڑے۔

آلوؤں کو گول سلائسز میں کاٹ لیں اور نیم گرم پانی میں بھگو دیں۔

ساتھ ہی ایک پیالے میں لال مرچ پاؤڈر، کٹی ہوئی مرچ، نمک، کالی مرچ، بیسن، آدھی چمچ کورن فلاور ڈال کر اچھی طرح پانی کے ساتھ مکس کرکے پیسٹ بنالیں پھر کڑاہی میں تیل گرم کرلیں اور ایک کپڑے کی مدد سے آلوؤں سے پانی کو نچوڑ کر پیسٹ میں ڈپ کرلیں پھر گرم تیل میں ڈیپ فرائی کرلیں لیجیئے تیار ہیں آپ کے مذیدار آلو کے پکوڑے اور ہری چٹنی کے ساتھ کھائیں ۔

 پالک کے پکوڑے

پالک کے پکوڑوں کا تو ذائقہ ہی الگ ہے ان کو بنانے کے لئے آپ پالک کو دھو کر باریک کاٹ لیں اور پھر بیسن، ایک چٹکی ہلدی، زیرہ، نمک، کالی مرچ پاؤڈر، ایک چمچ بیکنگ پاؤڈر ڈال کر پانی سے مکس کرلیں۔

بھر انہیں آئل میں فرائی کرلیں لیجئیے پالک کے پکوڑے دسترخوان پر سجنے کے لئے تیار ہیں۔

شملہ مرچ کے پکوڑے

شملہ مرچ کو دھو کر بیچ میں سے دو حصے کرلیں ۔

ایک پیالی میں پسا ہوا انار دانہ، کالی مرچ پاؤڈر، ہلدی، لال مرچ پاؤڈر، اجوائن اور لیموں چھڑک کر پیسٹ بنالیں۔

اس پیسٹ کو شملہ مرچ کے اندر اچھی طرح لگاکر بیسن میں ڈپ کرکے فرائی کرلیں۔

تیار ہیں سپائسی شملہ مرچ کے پکوڑے۔