وفاقی وزیر داخلہ شیخ رشید کا کہنا ہے کہ افغانستان میں استحکام اور ترقی سے پاکستان کی ترقی وابستہ ہے۔

تفصیلات کے مطابق وفاقی وزیر داخلہ شیخ رشید نے طورخم سرحد زیرو پوائنٹ پر میڈیا سے گفتگو کرتے ہوئے کہا کہ عظیم ترین ایجنسی کا چیف کابل گیا تو یہ اچھائی کی بات ہے، ڈی جی آئی ایس آئی کےدورہ افغانستان پر بھارت واویلا مچا رہا ہے۔

شیخ رشید نے کہا کہ جنرل فیض کابل گئے ہیں تو بھارت کو کیا تکلیف ہے، کیا امریکا، برطانیہ ودیگر ممالک کے لوگ افغانستان نہیں گئے؟

انہوں نے کہا کہ عمران خان نے کہا ہماری سرزمین کسی کے خلاف استعمال نہیں ہوگی، ہم نے افغانستان سے 10 ہزار افراد کا انخلاء کیا، 10 ہزار میں سے 9 ہزار افراد واپس چلے گئے، پاکستان سے 4 ہزار لوگ افغانستان گئے، افغانستان میں طالبان حکومت تسلیم کرنا وزیراعظم کا فیصلہ ہے۔

وزیر داخلہ نے کہا ہے کہ افغان بارڈر پر باڑ لگانے کا کام 92 فیصد مکمل ہو چکا ہے، افغانستان میں استحکام اور ترقی سے پاکستان کی ترقی وابستہ ہے، امید ہے افغان سرزمین پاکستان کے خلاف استعمال نہیں ہوگی۔

شیخ رشید کا کہنا ہے کہ پاکستان افغانستان میں امن چاہتا ہے، دنیا افغانستان کے مسائل کو سمجھے، پاکستان نے امن کی خاطر کلیدی کردار ادا کیا، بھارت کو افغانستان میں بہت بڑی شکست ہوئی ہے۔

 وفاقی وزیر داخلہ شیخ رشید نے مزید کہا کہ خطے کی صورتحال تبدیل ہورہی ہے، نادرا اور ایف سی نے زبردست انتظامات کیے ہیں، طورخم بارڈ پر مہاجرین کا کوئی کیمپ نہیں ہے۔