پنجاب میں  کورونا کی بگڑتی صورتحال کے پیش نظر پنجاب یونیورسٹی نے تعلیمی اور تحقیقی سرگرمیوں ان لائن کرنے کا فیصلہ کرلیا ہے۔

   تفصیلات کے مطابق نیشنل کمانڈ اینڈ آپریشن سینٹر (این سی او سی) کی ہدایات پر کورونا کی بگڑتی صورتحال کے پیش نظر پنجاب یونیورسٹی نے تعلیمی اور تحقیقی سرگرمیوں ان لائن کرنے کا فیصلہ کرلیا، رجسٹرار پنجاب یونیورسٹی نے نوٹیفکیشن جاری کردیا۔

نوٹیفکیشن  کے مطابق 13 ستمبر سے تمام کلاس اور تحقیقی سرگرمیوں ان لائن کرنے کی ہدایات کردیں گئیں جبکہ 14 ستمبر کی شیڈول اکیڈمک کونسل بھی ملتوی کردی گئی ہے۔ اکیڈمک کونسل کی نئی تاریخ کا اعلان بعد میں کیا جائے گا۔

دوسری جانب سماجی رابطے کی ویب سائٹ ٹوئٹر پر جاری اپنے پیغام میں صوبائی وزیر تعلیم پنجاب ڈاکٹر مراد راس نے کہا ہےکہ پنجاب کے تمام سرکاری و نجی تعلیمی ادارے 15 ستمبر تک بند رہیں گے۔

Advertisement

ANNOUNCEMENT:
All Public and Private Schools of Punjab to remain closed until Wednesday September 15th, 2021. Stay home and stay safe.

— Murad Raas (@DrMuradPTI) September 10, 2021

 ڈاکٹر مراد راس نے اپنی ٹوئٹ کے اختتام میں لکھا کہ ایس او پیز پر عملدرآمد کو ہر ممکن یقینی بنائیں۔

صوبائی وزیر نے مزید کہا کہ اسکولوں کی بندش کا فیصلہ کورونا وباء کی صورتحال کومدنظر رکھتے ہوئے کیا گیا ہے۔

واضح رہےکہ گزشتہ روز این سی او سی کی جانب سے جاری نوٹیفکیشن میں کہا گیا تھا کہ کورونا پابندیوں میں توسیع کرتے ہوئے تعلیمی ادارے 15 ستمبر تک بند رکھنے کا فیصلہ کر لیا گیا ہے۔

نوٹیفکیشن میں کہا گیا کہ کورونا سے متاثرہ 24 حساس اضلاع میں تعلیمی ادارے بروز بدھ مورخہ 15 ستمبر تک مزید بند رہیں گے، اس توسیع کا فیصلہ کورونا صورتحال اور ہیلتھ سسٹم پر دباؤ کے پیش کیا گیا ہے۔ کورونا کی پابندیوں کا اطلاق ملک بھر کے 24 حساس اضلاع پر ہوگا۔

خیال رہے کہ اس سے قبل کورونا کیسز میں اضافے کے پیش نظر پنجاب میں 6 سے 11 ستمبر تک تمام سرکاری اور نجی سکول بند کرنے کا فیصلہ کیا گیا تھا جبکہ اسلام آباد میں بھی اسکول 11 ستمبر تک بند کرنے کا فیصلہ کیا گیا تھا۔