صوبائی وزیر قانون راجہ بشارت کا کہنا ہے کہ وکلاء برادری کے مسائل ترجیحی بنیادوں پر حل کریں گے۔

تفصیلات کے مطابق صوبائی وزیر قانون راجہ بشارت سے پنجاب بارکونسل کے وفد کی ملاقات ہوئی جس میں وفد کی قیادت وائس چیئرمین پنجاب بار کونسل فرحان شہباز کر رہے تھے۔

ملاقات میں بار ایسوسی ایشنز کی ترقی اور وکلاء کی بہبود کے حوالے سے غور کیا گیا۔

راجہ بشارت نے کہا کہ فوری اور سستے انصاف کی فراہمی کے لیے بنچ اور بار کا کردار نہایت اہم ہے، وزیر اعلیٰ عثمان بزدار کی قیادت میں پنجاب حکومت نے وکلاء اور بارز کے استحکام کے لیے ٹھوس اقدامات کیے ہیں۔

صوبائی وزیر قانون راجہ بشارت نے مزید کہا کہ کورونا لاک ڈاؤن کے دوران پنجاب بھر کے مستحق وکلاء کو مالی امداد دی گئی، پنجاب بھر کی بار ایسوسی ایشنز کو تحصیل سطح تک بلا تفریق گرانٹ دی گئی، آئندہ بھی وکلاء تنظیموں کے ساتھ مشاورت اور رابطہ جاری رکھیں گے۔

دوسری جانب چیئرمین پنجاب بار کونسل فرحان شہباز کا کہنا ہے کہ وزیر اعلیٰ عثمان بزدار اور وزیر قانون راجہ بشارت کے تعاون پر شکر گزار ہیں، سستے انصاف کی فراہمی کے لیے پنجاب حکومت کے ساتھ تعاون جاری رکھیں گے۔

واضح رہے کہ ملاقات میں چیئرمین ایگزیکٹو کمیٹی محمد افضل، چیئرمین ویلفیئر چوہدری بابر، سیکرٹری لاہور ہائی کورٹ بار محسن عباس اور دیگر عہدیدار بھی موجود تھے۔