وزیر اعظم عمران خان کا کہنا ہے کہ سرمایہ کاروں کیلئے ہر ممکنہ آسانی پیدا کرنا حکومت کی اولین ترجیح ہے۔

تفصیلات کے مطابق وزیر اعظم عمران خان کی زیرِ صدارت اسپیشل اکنامک زونز میں سرمایہ کاری بڑھانے کے حوالے سے اعلیٰ سطح پر اجلاس ہوا جس میں متعلقہ اعلیٰ حکام نے شرکت کی۔

اجلاس میں اسپیشل اکنامک زونز میں مقامی و غیر ملکی سرمایہ کاروں کی آسانی کے لئے ون ونڈو سروسز پورٹل کے قیام میں عملی پیش رفت ہوئی ہے۔

اس کے علاوہ ون ونڈو سروسز کے قیام کے لئے جامع حکمت عملی مرتب کر لی گئی ہے۔

اجلاس کو بریفنگ دی گئی کہ سرمایہ کاری بورڈ کے تحت ون ونڈو سروسز پورٹل کا قیام سرمایہ کاروں کو درپیش مشکلات کو دور کرنے کیلئے عمل میں لایا جا رہا ہے۔

بریفنگ میں بتایا گیا کہ پورٹل انتظامی اور قانونی منظوریوں کے حصول بلکہ صنعتوں کو سہولیات کی فراہمی میں بھی معاؤنت کرے گا، اس کے لئے متعلقہ محکموں کو دو مرحلوں میں پورٹل میں شامل کیا جا رہا ہے۔

پورٹل میں کاغذی کارروائی اور ڈیجیٹل منظوریاں شامل ہیں،  پورٹل میں وفاقی اور صوبائی محکمے بھی شامل کیے جا رہے ہیں۔

عمران خان نے کہا ہے کہ حکومت صنعتی ترقی کیلئے ملکی و غیر ملکی سرمایہ کاروں کی راہ میں حائل رکاوٹیں ختم کر رہی ہے۔

وزیر اعظم عمران خان نے مزید کہا کہ پورٹل کے حوالے سے تمام اسٹیک ہولڈرز سے مشاورت و مربوط کوارڈینیشن کو یقینی بنایا جائے اور پورٹل کا قیام  و فعالی مقرر کردہ وقت میں یقینی بنایا جائے۔