پی ڈی ایم کے ترجمان حافظ حمداللہ نے کہا ہے کہ عمران خان آئے روز قوم کو بےوقوف بنانے کے لئے کہتے ہیں کہ مافیاز کام کرنے نہیں دیتے۔
تفصیلات کے مطابق پی ڈی ایم کے ترجمان حافظ حمداللہ نے اپنے ایک بیان میں کہا کہ عمران خان تم قوم کو بتاؤ مافیا کون ہے؟ ان کے نام بتاؤ؟ آپ اور آپکی حکومت اتنی بے بس ہے تو مستعفی ہو کر گھرجاؤ، حالانکہ حقیقت یہ ہے کہ مافیاز آپ کی کابینہ میں بیٹھے ہیں، آٹا مافیا، چینی مافیا، دوائی مافیا، پٹرول مافیا، اور ان تمام مافیاز جس کی لمبی فہرست ہے سرپرستی آپ کررہے ہیں۔
حافظ حمداللہ کا کہنا تھا کہ اچھا خاصا پاکستان کو 3 سالہ دورِ حکومت میں عمران خان نے بحرانستان بنادیا، مہنگائی کا بحران، بے روزگاری کا بحران، میرٹ کا بحران، لوڈ شیڈنگ کا بحران، لاقانونیت کابحران، آئینی بحران، سیاسی اور جمہوری بحران، اداروں کا بحران، عمران خان تم قوم کونیا پاکستان نہ دے سکے نہ پرانا پاکستان دے سکے اور نہ قائداعظم کا پاکستان دے سکے، تمہیں خود معلوم نہیں کہ یہ کونسا پاکستان ہے۔
انہوں نے کہا کہ مدینے کی ریاست بنانے کا دعویٰ کرتے رہے ہو مگر آپ اور آپکی حکومت کی نااہلی، نالائیقی کردار نے مدینے کی ریاست کا چہرہ مسخ کیا۔
پی ڈی ایم کے ترجمان حافظ حمداللہ نے مزید کہا کہ پی ڈی ایم مولانا فضل الرحمن کی قیادت میں قوم کو آپ سے اور آپکی حکومت سے نجات دلائے گی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News