وزیر اعلیٰ پنجاب سردار عثمان بزدار نے کہا ہے کہ پنجاب میں اسپیشل ٹیکنالوجی زون کے قیام سے ترقی و خوشحالی کا انقلاب آئے گا اور نوجوان معاشی خودمختاری کی راہ پر گامزن ہوں گے۔

تفصیلات کے مطابق وزیراعلیٰ پنجاب سردار عثمان بزدار سے چیئرمین اسپیشل ٹیکنالوجی زونز اتھارٹی عامر ہاشمی اوروفد کی ملاقات ہوئی جس میں وزیر اعلیٰ پنجاب سردار عثمان بزدار نےٹیکنالوجی کو فروغ دینے کیلئے بڑا اقدام  کیا ہے،لاہور میں ا سپیشل ٹیکنالوجی زون بنانے کا اصولی فیصلہ  کیا گیا  جبکہ اسپیشل ٹیکنالوجی زون کے منصوبے کی جلد تکمیل کے لئے جوائنٹ ونچر گروپ قائم کرنے کی منظوری  دی ہے۔

وزیر اعلی عثمان بزدار نے اسپیشل ٹیکنالوجی زون کے قیام کے منصوبے پر جلد ازجلد پیشرفت کی ہدایت کی ہے۔

عثمان بزدار کا کہنا تھا کہ  آئندہ نسلوں کی معاشی بقاء کے لئے ٹیکنالوجی کا فروغ بہت ضروری ہے -ا سپیشل ٹیکنالوجی زون میں غیر ملکی سرمایہ کارو ں کو تمام ممکنہ سہولتیں دیں گے ۔

ان کا کہنا تھا کہ ٹیکنالوجی زون میں ایگری ٹیک سافٹ ویئر اور دیگر سافٹ پراڈکٹس تیار کئے جا سکیں گے-

وزیر اعلیٰ پنجاب سردار عثمان بزدار کا مزید  کہنا تھا کہ  لاہور کے بعد بہاولپور، رحیم یار خان، ملتان اور ڈیرہ غازی خان سمیت دیگر شہرو ں میں بھی مرحلہ وار اسپیشل ٹیکنالوجی زون قائم کئے جائیں گے ،ٹیکنالوجی بیسڈانویسٹمنٹ کے لئے حکومت پنجاب آسانیاں پیدا کرے گی ۔

اس موقع پر  صوبائی وزیر خزانہ ہاشم جواں بخت، چیف سیکرٹری، پرنسپل سیکرٹری وزیراعلیٰ، سیکرٹری صنعت،اسپیشل مانیٹرنگ یونٹ کے سربراہ،اسپیشل ٹیکنالوجی زونز اتھارٹی کے ایگزیکٹو ڈائریکٹر عامر سلیمی، ڈائریکٹر پلاننگ اینڈ سٹریٹجک کمیونیکیشنز حمزہ سعید کزئی اور ڈی جی آئی ٹی عبدالرحیم بھی موجود تھے۔