ترجمان پنجاب حکومت فیاض الحسن چوہان نے کہا ہے کہ بلاول زرداری بھٹو  کی وزیر اعلیٰ پنجاب سردار عثمان بزدار پر تنقید آسمان پر تھوکنے کے مترادف ہے۔

تفصیلات کے مطابق ترجمان پنجاب حکومت فیاض الحسن چوہان نے پاکستان پیپلز پارٹی کے چیئرمین بلاول بھٹو زرداری کے بیان پر رد عمل دیتے ہوئے کہا کہ سردار عثمان بزدار تین سال میں سندھ کے سابقہ وزیر اور موجودہ وزیرِ اعلیٰ سے آگے نکل گئے ہیں۔

ان کا کہنا تھا کہ آج بزدار کا پنجاب ہر شعبے میں سندھ سے کئی گنا آگے ہے۔

فیاض الحسن چوہا ن کا کہنا تھا کہ بلاول زرداری بچہ ہے، من کا کچا ہے اور بچپن سے کرپشن اور منی لانڈرنگ میں پکا ہے۔

ترجمان پنجاب حکومت کا کہنا تھا کہ آصف زرداری کے زیرِ تربیت بلاول زرداری نے چھوٹی عمر میں بڑی کرپشن کے گر سیکھے ہیں۔

ان کا کہنا تھا کہ پنجاب کی باشعور عوام بلاول زرداری کو آتے ہی آئینہ دکھا چکی ہے،پیپلز پارٹی اور بلاول کی پنجاب میں مقبولیت کا اندازہ کنٹونمنٹ بورڈ انتخابات سے لگایا جا سکتا ہے۔

فیاض الحسن چوہان کا کہنا تھا کہ  کنٹونمنٹ بورڈ انتخابات میں پیپلز پارٹی کے امیدوار شاذ و نادر ہی نظر آ رہے ہیں،پنجاب فتح کرنا تو دور کی بات،پلز پارٹی پنجاب کی سیاست میں داخل بھی نہیں ہو سکتی۔

ترجمان پنجاب حکومت کا کہنا تھا کہ وزیرِ اعلیٰ پنجاب سردار عثمان بزدار نے اپنی لازوال پرفارمنس سے عوام کے دل جیتے ہیں۔

ترجمان پنجاب حکومت فیاض الحسن چوہان کا مزید کہنا تھا کہ بلاول زرداری اپنی بے مثال کرپشن سے عثمان بزدار کی جگہ لینے کا خام خیال دل سے نکال دیں۔