پاکستان تحریک انصاف آزاد کشمیر کے صدر و سینئر وزیر سردار تنویر الیاس  نے کہا ہے کہ آزاد کشمیر کو سیاحوں کے لئے حقیقی جنت بنائیں گے۔

تفصیلات کے مطابق پاکستان تحریک انصاف آزاد کشمیر کے صدر و سینئروزیر سردار تنویر الیاس  نے دورہ پونچھ کے دوران میڈیا سے گفتگو کرتے ہوئے کہا کہ سیاحت کے تاریخ ساز منصوبے کیلئے ماہرین کے ہمراہ چار مقامات دیکھ لئےہیں،حکومت آزاد کشمیر  سیاحت کے نئے منصوبوں کیلئےلاجسٹک سمیت جملہ معاونت فراہم کرے گی۔

پاکستان تحریک انصاف آزاد کشمیر کے صدر نے کہا  کہ عمران خان کی ہدایت پر آزاد کشمیر میں ماڈل ٹورازم ٹاون قائم کیا جائے گا۔

  تنویر الیاس  کا کہنا تھا کہ آزاد کشمیر میں سیاحت کے شعبہ میں لانگ ٹرم منصوبے شروع کئے جائیں گے۔

پاکستان تحریک انصاف آزاد کشمیر کے صدر و سینئروزیر سردار تنویر الیاس کا مزید کہنا تھا کہ سیاحت  میں سر مایہ کاری کرنے والوں کو اسپیشل اکنامک زون بنا کر دیں گےاور آزاد کشمیر کو سیاحوں کے لیئے حقیقی جنت بنائیں گے۔

واضح رہے اس سے قبل پاکستان تحریک انصاف آزاد کشمیر کے صدر سردار تنویر الیاس نے پریس کانفرنس کرتے ہوئے کہا تھا کہ آزاد کشمیر کے دو حلقوں میں ضمنی انتخابات ہونے جارہے ہیں، میرپور میں ہمارے امیدوار یاسر بہت مضبوط ہیں۔

پاکستان تحریک انصاف آزاد کشمیر کے صدر نے کہا تھا کہ ہمارے کارکنان نے اپنی جان دے کر الیکشن چوری کرنے کا راستہ روکنے کی کوشش کی ، پاکستان تحریک انصاف کارکنان کی قربانیوں کی قدر کرتی ہے ، جیالا ازم صرف پیپلز پارٹی میں تھا لیکن کارکن اب مایوس ہیں۔

تنویر الیاس نے کہا تھا کہ پیپلزپارٹی کے کارکنان نے دیکھا کہ کیسے پیسہ باہر گیا ، پیسہ ٹرکوں اور لانچوں کے ذریعے ملک سے باہر لے جایا گیا ، زرداری صاحب کہتے ہیں ریڑھی والوں کا قصور ہے کہ اس کے اکاؤنٹ میں پیسے آگئے۔

پاکستان تحریک انصاف آزاد کشمیر کے صدر سردار تنویر الیاس کا مزید کہنا تھا کہ عمران خان بہت پر آسائش زندگی چھوڑ کر سیاست میں آئے ، پورے مغرب میں صرف ایک پاکستانی سیاستدان کی پہچان ہے وہ عمران خان ہے۔