عوامی نیشنل پارٹی کے سربراہ اسفند یار ولی خان نے کہا ہے کہ دوسروں پر کرپشن  کے بہتان لگانے والے لیکس میں نام آنے پر خاموش ہیں۔

تفصیلات کے مطابق عامی نیشنل پارٹی(اے این پی) کے سربراہ اسفند یار ولی خان نے اپنے ایک بیان میں کہا کہ خود کرپشن میں ملوث حکومت کا پنڈورا پیپرز کی تحقیقات کا اعلان مضحکہ خیز ہے، ووٹ چوری کرکے پاکستان پر مسلط سلیکٹڈ وزیر اعظم کا احتساب بھی سلیکٹڈ ہے۔

ان کا کہنا تھا کہ حکومت کی جانب سے تحقیقات کا اعلان کرنا اپنے ساتھیوں کو بچانے کی ایک بھونڈی کوشش کے سوا کچھ نہیں، پانامہ لیکس اور آف شور لیکس میں بھی سب سے زيادہ پی ٹی آئی اور انکے اتحادی اراکین کے نام تھے۔

اسفند یار ولی کا کہنا تھا کہ  تحقیقات کے نام پر صرف زبانی جمع خرچ سے عوام کو بیوقوف نہیں بنایا جاسکتا ،ملائیشیا اور دبئی میں جائیدادوں کو بنیاد بنا کر سب سے زیادہ میڈیا ٹرائل اے این پی ہی کا کیا گیا ان جائیدادوں کو ثابت کرنا تو دور آج تک اے این پی کے کسی ایک کارکن پر ایک آنے کی کرپشن بھی ثابت نہیں کی جا سکی۔

ان کا کہنا تھا کہ  عوامی نیشنل پارٹی آج بھی میدان میں کھڑی ہے اور احتساب کیلئے تیار ہے، نیب تحریک انصاف کی چھتری تلے آنے والوں کو فرشتہ جبکہ دیگر کو گناہنگار قرار دے دیتی ہے ۔

اے این پی کے سربراہ کا کہنا تھا کہ پنڈوراپیپرز کی تحقیقات کیلئے ایک بااختیار کمیشن کا قیام عمل میں لایا جائے جو متعین وقت کے اندر تحقیقات مکمل کرے ۔

ان کا کہنا تھا کہ قانون سے کوئی بالاتر نہیں لیکن پاکستان میں الٹی گنگا بہہ رہی ہے اور امیر وغریب کے لئے قانون کے الگ الگ معیار ہیں۔

اسفند ولی یار کا کہنا تھا کہ  پنڈورا پیپرز میں شامل سیاستدانوں، سابق فوجی افسران اور ان کے اہل خانہ سمیت دیگر تمام افراد کو قانون کے کٹہرے میں لایا جائے ۔

ان کا کہنا تھا کہ اس سے بڑھ کر کیا کرپشن ہوگی کہ حکومت نے مالیاتی اداروں سے ایسے معاہدے کئے ہیں جس کا سارا زور عوام سے نکالا جارہا ہے ۔

ان کا کہنا تھا کہ چند  دن پہلے عوام پر پٹرول بم گرایا گیا جبکہ آج بجلی مہنگی کر کے عوام کی مشکلات میں مزید اضافہ کردیا گیاہے ۔

عوامی نیشنل پارٹی کے سربراہ اسفند ولی یار خان کا مزید کہنا تھا کہ حکومت کو دیگر معاملات کے ساتھ ساتھ مہنگائی اور بے روزگاری کو قابو کرنے کیلئے بھی اقدامات کرنے ہوں گے۔