وزیر اعظم عمران خان نے کہا ہے کہ دو خاندانوں سے ذاتی لڑائی نہیں ہے، ان سے دوستی ہوا کرتی تھی۔

اکادمی ادبیات پاکستان میں ’ایوان اعزاز‘ کی تقریب سے خطاب کرتے ہوئے انہوں نے کہا کہ لوگ کہتے ہیں میں اپوزیشن سے ہاتھ نہیں ملاتا، ان پر اربوں روپے کی کرپشن کے الزامات ہیں، ان سے ہاتھ ملانے کا مطلب کرپشن کوتسلیم کرنا ہے، سب کہتے ہیں آپ 2 خاندانوں کے پیچھے کیوں پڑے رہتے ہیں۔

وزیر اعظم کا کہنا تھا کہ ان 2 خاندانوں سے کوئی ذاتی لڑائی نہیں بلکہ دوستیاں ہوتی تھیں، کرپشن کی وجہ سے ہمارا مورال بری طرح نیچےگرا، سینیٹ میں پیسے چلتےہیں، لوگ ادھر سے ادھر چلے جاتے ہیں، اگر اپوزیشن لیڈر سے ہاتھ ملا لیا تو اس کا مطلب ہے میں نے انہیں تسلیم کرلیا۔

 انہوں نے کہا کہ آج پاکستان میں اسکالرز کی بہت ضرورت ہے، اسکالرز کی اہمیت کم ہونے سے تہذیبیں زوال پذیر ہوجاتی ہیں۔

وزیراعظم کا کہنا تھا کہ اسکالرز قوم کا قبلہ درست کرتے ہیں، مسلمانوں کے سنہری دور میں اسکالرز کی بہت اہمیت تھی، میری کسی سے ذاتی دشمنی نہیں میں  کرپشن کے خلاف لڑتا ہوں۔

انہوں نے کہا کہ عالم کا بہت بڑا رتبہ ہوا کرتا ہے، دانشوروں اور اسکالرز کو خراجِ تحسین پیش کرتا ہوں، دانشوروں کی اہمیت کم ہونے سے تہذیبیں زوال پذیر ہوجاتی ہیں۔

عمران خان کا کہنا تھا کہ اسکالرز راستہ بھول جائیں تو معاشرہ تباہ ہوجاتا ہے، آج کے پاکستان میں اسکالرز کی بہت ضرورت ہے، اسکالرز قوم کے نظریے کا تحفظ کرتے ہیں، دانشوروں اور اسکالرز کی ادبی خدمات کو خراجِ تحسین پیش کرتے ہیں۔

وزیر اعظم عمران خان نے مزید کہا کہ افسوس ہوتا ہے کہ لوگوں کو آج تک اسلام کی تاریخ کا نہیں پتہ، لوگوں سے اسلام کی تاریخ کا پوچھیں تو انہیں صرف جنگیں یاد ہوتی ہیں، جب قوم میں اچھے برے کی تمیز ختم ہوجائے تو وہ قوم مرجاتی ہے۔