وزیر اعظم عمران خان کی زیر صدارت وفاقی کابینہ کا اجلاس ختم ہوگیا ، اجلاس کی اندرونی کہانی سامنے آ گئی ہے۔

ذرائع کے مطابق وزیراعظم نے وزراء کو کالعدم ٹی ایل پی سے متعلق بیانات دینے سے روک دیا ہے۔

 وزیر اعظم نے ہدایت کی ہےکہ حساس معاملات میں غیر ضروری بیانات سے گریز کیا جائے، ملک کے اندرونی اور بیرونی دشمن غیرذمہ دارانہ بیانات سے فائدہ اٹھاتے ہیں۔

وزیراعظم نے مزید کہاکہ اگر بیانات ضروری ہوں تو ان میں احتیاط برتی جائے۔

 کابینہ میں اعظم سواتی اور فواد چوہدری کے الیکشن کمیشن کی جانب سے جاری کردہ  نوٹس کے معاملے پر بھی بات چیت ہوئی۔

وزیر اعظم نے آئندہ پیشی پر وزراء کو اعظم سواتی اور فواد چوہدری کے ہمراہ الیکش کمیشن جانے کی ہدایت کی۔

وزیراعظم عمران خان نے کہاکہ  وزراء اتحاد کا مظاہرہ کریں، اتحاد میں طاقت ہے، دلیری کا مظاہرہ کرنا چاہئیے۔

 وزیراعظم نے کابینہ اجلاس میں موقف دیتے ہوئے کہاکہ اصلاحات لانا آسان نہیں، مشکلات آتی ہیں مل کر سامنا کریں گے۔

ذرائع کے مطابق وفاقی کابینہ کے اجلاس میں متعددایجنڈا آئٹمر کی منظوری دیدی گئی۔

وفاقی وزیراطلاعات ونشریات فواد چوہدری شام سوا پانچ بجے پریس کانفرنس میں کابینہ کے فیصلوں بارے آگاہ کریں گے۔

واضح رہےکہ حکومتی اتحادی جماعتوں کے رہنما آج کابینہ اجلاس کے بعد وزیراعظم سے ملاقات کریں گے۔

وزیراعظم عمران خان اہم فیصلوں کے متعلق اتحادی جماعتوں سے مشاورت کریں گے۔

ذرائع کے مطابق مشاورتی اجلاس میں ایم کیوایم، گرینڈ ڈیموکریٹک الائنس، ق لیگ اور بلوچستان عوامی پارٹی(بی اے پی) کومدعو کیا گیا ہے۔

 اتحادی جماعتوں کو مذہبی جماعت کےاحتجاجی مارچ سے پیدا ہونے والی صورتحال پراعتماد میں لیا جائے گا۔

اتحادی جماعتوں کو مذہبی جماعت سےمعاہدے پربھی اعتماد میں لیا جائے گا۔