پی ٹی آئی کے رہنما فیصل جاوید خان نے کہا ہے کہ بیرون ملک مقیم پاکستانی باہر بیٹھ کر ووٹ کاسٹ کر سکیں گے۔

میڈیا سے گفتگو کرتے ہوئے سنیٹر فیصل جاوید نے کہا کہ آج تاریخی دن ہے، اوورسیز پاکستانیوں کو مبارک ہوآئندہ انتخابات میں الیکٹرانک ووٹنگ مشین کا استعمال ہو گا۔

پی ٹی آئی کے رہنما کا کہنا تھا کہ بیرون ملک مقیم پاکستانی باہر بیٹھ کر ووٹ کاسٹ کر سکیں گےآج حکومت اور اتحادیوں نے مل کر یہ قانون سازی کر دکھائی۔

 فیصل جاوید خان نے کہا کہ اپوزیشن کی کوشش تھی کہ وہ ڈیل کر سکیں لیکن عمران خان نے کہا کہ وہ کسی صورت ڈیل نہیں کریں گے۔

 پی ٹی آئی کے رہنما فیصل جاوید خان  کا مزیدکہنا تھا کہ اپوزیشن والے چھوئی موئی بنے ہوئے ہیں  جبکہ عمران خان نے دھاندلی کے خلاف دنیا کی تاریخ کا طویل ترین احتجاج کیا اور یہ کامیابی پی ٹی آئی کی نہیں عوام کی کامیابی ہے۔

یاد رہے اس سے قبل  پارلیمنٹ میں حکومت کا الیکٹرانک ووٹنگ مشین کے استعمال کرنے اور اوورسیز پاکستانیوں کو ووٹ کا حق دینے کا بل منظور کرلیا گیا ہے۔

اسپیکر قومی اسمبلی کی زیر صدارت پارلیمنٹ کا مشترکہ اجلاس ہوا ، بل کی تحریک وزیراعظم کے مشیر بابر اعوان نے پیش کی تھی۔

آج دوپہر ایک گھنٹے سے زائد تاخیر سے شروع ہونے والے مشترکہ اجلاس میں حزبِ اختلاف کی جانب سے شدید مخالفت، تنقید اور احتجاج کے باوجود حکومت کی جانب سے پیش کیا گیا انتخابی ترمیمی بل 2021 سادہ اکثریت سے منظور کرلیا گیا۔

الیکٹرانک ووٹنگ مشین (ای وی ایم) سے متعلق ترمیمی بل اور سمندر پار پاکستانیوں کو ووٹ کا حق دینے کا بل بھی ایوان نے کثرت رائے سے منظور کرلیا۔

گرفتار بھارتی جاسوس کلبھوشن یادو کیس سے متعلق عالمی عدالت انصاف میں نظرثانی کا بل 2021 بھی کثرت رائے سے منظور ہوگیا۔