وزیراعظم کا کہنا ہےکہ تعمیراتی شعبے کو90 فیصد ٹیکس کی چھوٹ دی۔

وزیرِاعظم عمران خان نے اسلام آباد میں نیا پاکستان ہاؤسنگ اتھارٹی کے منصوبے فراش ٹاؤن اپارٹمنٹس کا دورہ کیا، اس دوران خطاب کرتے ہوئے انہوں نے کہاکہ فراش ٹاؤن میں 2 ہزار اپارٹمنٹس کم آمدن کے لوگوں کیلئے ہیں۔

انہوں نے کہاکہ کوشش ہے جتنا ایک ماہ کا کرایہ ہو وہی قسط ہو، ایک لاکھ گھروں کیلئے 3 لاکھ فی گھر سبسڈی کیلئے رکھا، ملک میں پہلی بارگھربنانےکیلئے بینکوں نے قرضے دینا شروع کیے۔

وزیراعظم کا کہنا تھا کہ ہم نے 2 سال لگائے اوربینکوں کوقرض دینے پر آمادہ کیا، ملک میں کم آمدن والےلوگوں کی کسی حکومت نے مدد نہیں کی۔

انہوں نے مزید کہاکہ پیسے والےلوگ گھربنا سکتےہیں،غریب کیلئےاپنا گھربہت مشکل ہے۔

دورے کے دوران وزیرِاعظم کو منصوبے پر جاری ترقیاتی کام پر تفصیلی بریفنگ دی گئی۔

وزیرِاعظم عمران خان نے جاری ترقیاتی کام کا تفصیلی جائزہ لیا اور ضروری ہدایات بھی دیں۔

واضح رہے کہ نیا پاکستان ہاؤسنگ اتھارٹی کے منصوبے فراش ٹاؤن اپارٹمنٹس ایف ڈبلیو او اور سی ڈی اے کے تعاون سے تعمیر کیا جا رہا ہے۔

اس منصوبے میں جدید سہولیات سے آراستہ 4000  فلیٹس بنائے جائیں گے۔

منصوبے میں دو ہزار  فلیٹس نیا پاکستان ہاؤسنگ اتھارٹی کے تحت رجسٹر افراد جبکہ چار سو فلیٹس کچی آبادیوں کے رہائشیوں کیلئے مختص کئے گئے ہیں۔

وزیرِ اعظم عمران خان آج اسلام آباد میں نیا پاکستان ہاؤسنگ اتھارٹی کے منصوبے فراش ٹاؤن اپارٹمنٹس کا دورہ کریں گے pic.twitter.com/EdkS73NXg5— Prime Minister’s Office, Pakistan (@PakPMO) November 19, 2021

وزیرِ اعظم عمران خان  نے منصو بے کا سنگِ بنیاد رواں سال اپریل میں رکھا تھا، جس کے بعد اس پر تیزی سے کام جاری ہے۔

ذرائع کے مطابق یہ منصوبہ 84 ایکڑ رقبے پر محیط ہے جبکہ اس میں گرین بیلٹس اور پارکس کو بھی ترجیح دی گئی ہے۔

اس سے قبل وزیراعظم کے معاون خصوصی زلفی بخاری کا کہنا تھا کہ نیا پاکستان ہاؤسنگ منصوبے کے تحت 1000 سے زائد فلیٹس اور500 مکانات تیار کئے گئے ہیں، محنت کشوں کوپہلی بارمورٹگیج کی بنیاد پراپنی ذاتی چھت دی جارہی ہے، ‏5 لاکھ روپے سے کم آمدنی والوں کوفلیٹس اورگھروں کےمالکانہ حقوق دیے گئے ہیں۔

انہوں نے کہاکہ ورکرز کلاس کیلئے قیمت کی معمولی قسط اورآسان شرائط کوبھی یقینی بنایا گیا ہے۔

معاون خصوصی زلفی بخاری کا کہنا تھا کہ سابقہ ادوار میں حکومتی عدم دلچسپی سے منصوبہ تاخیر کا شکار ہوا۔ ورکرزویلفیئرفنڈ‏فنڈز کی عدم فراہمی پر کانٹریکٹر نے منصوبہ ادھورا چھوڑ دیا تھا۔