سانحہ سیالکوٹ کے خلاف سینیٹ میں مذمتی قرارداد منظور کر لی گئی۔
چئیرمین سینیٹ صادق سنجرانی نے سینیٹ اجلاس کی صدارت کی۔
چئیرمین کا کہنا تھا کہ سینیٹ کا ایک وفد سری لنکن شہری کی ہلاکت پر اظہار افسوس کیلئے سری لنکا جائے گا۔
اراکین نے سانحہ سیالکوٹ میں ملوث ملزمان کے خلاف سخت کارروائی کا مطالبہ کیا۔
معمول کی کارروائی معطل کرکے سانحہ سیالکوٹ پر بحث کی گئی ۔
قائد ایوان ڈاکٹر شہزاد وسیم نے سری لنکن شہری پرینتھا کمارا کے قتل سے متعلق قرارداد پیش کی جسے متفقہ طور پر منظور کرلیا گیا۔
مذمتی قرارداد کے متن کے مطابق ایوان ایسے انتہا پسندی کے واقعات کی مذمت کرتا ہے، ایسے واقعات سے ہمارے مذہب کا کوئی تعلق نہیں۔
قرارداد کے ذریعے حکومت سے مطالبہ کیا گیا کہ کہ واقعے میں ملوث افراد کے خلاف کارروائی کرے۔
یہ بھی پڑھیں: الیکشن کمیشن ممبران کی تقرری: حکومت اور اپوزیشن کے درمیان بریک تھرو
اعظم نذیر تارڑ، رضا ربانی ،سینیٹر مشتاق احمد،مولانا عطاء الرحمان ،طاہر بزنجو اور دیگر کا کہنا تھا کہ ایک جتھے نے سری لنکن شہری پر توہین رسالت کا الزام لگاکرلاش کو جلا کر جشن منایا،یہ دہشتگردی کا بدترین واقعہ تھا۔
انہوں نے کہاکہ اس واقعے سے پاکستان کی عالمی سطح پر بدنامی ہوئی،علماء سمیت پورے ملک نے اس کی بھرپور مذمت کی۔
قائد ایوان شہزاد وسیم اور وزیر ریلوے اعظم سواتی اور دیگر حکومتی اراکین نے کہا کہ ہمیں شدت پسندی کا مقابلہ کرنا ہوگا، ہم سب کی ذمہ اری ہے کہ رواداری سے متعلق ذہن سازی کا اہتمام کریں۔
اعظم سواتی نے کہا کہ انتہاپسندی کی وجہ سے انسانی جانوں کے ساتھ ساتھ اب تک کروڑوں اربوں کا نقصان ہو چکا ہے، بدقسمتی سے توہین مذہب یا توہین رسالت کو متعدد لوگوں نے اپنے مفادات کی خاطر تشریح کرکے استعمال کیا۔
ذرائع کے مطابق اجلاس میں مشیر خزانہ شوکت ترین نے چئیرمین سینیٹ سے اپنی رکنیت کا حلف بھی لیا۔
سینیٹ اجلاس پیر کی سہ پہر تین بجے تک ملتوی کر دیا گیا۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News