واٹس ایپ نے میٹا کے نئے ڈیجیٹل والٹ کو استعمال کرتے ہوئے ادائیگیوں کے آپشن میں کرپٹو کرنسی کا اضافہ کردیا ہے۔
میٹا کے نئے والٹ Novi کی بدولت اب واٹس ایپ کے استعمال کنندگان اب اپنے عزیز و اقارب اور دوستوں کے ساتھ بات چیت کرتے ہوئے ڈیجیٹل کرنسی کو بھیج اور وصول کر سکتے ہیں۔ فیس بک کا ڈیجیٹل والٹ نووی اس وقت گوئٹے مالا اور امریکا میں دست یاب ہے، لیکن کرپٹو کرنسی کی لین دین کی اجازت فی الحال امریکی ریاستوں موجود استعمال کنندگان کے لیے دی گئی ہے۔
اس بات کا اعلان Novi کی سربراہ اسٹیفنی کیسرئیل نے اپنی ایک ٹوئٹ میں کیا جس میں ان کا کہنا تھا کہ’ واٹس ایپ میں کرپٹو کرنسی کے اس فیچر کو آزمائشی طور پر مخصوص استعمال کنندگان کے ساتھ ٹیسٹ کیا جا رہا ہے۔ میٹا (پرانا نام فیس بک) نے اپنے پلیٹ فارمز پر ڈیجیٹل والٹ Novi کو گزشتہ سال اکتوبر میں متعارف کرایا تھا۔ ہم اکثر وبیشتر سنتے ہیں کہ لوگ واٹس ایپ کو اپنے پیاروں کو پیسے بھیجنے کے لیے استعمال کرتے ہیں اور Novi نے لوگوں کو یہ کام انتہائی محفوظ طریقے سے فورا ً اور کسی فیس کے بنا سر انجام دینے کا اہل بنادیا ہے، جب کہ ان کی بھیجی یا وصول کی گئی رقم فوراً لوگوں کی چیٹ میں دکھائی دے گی۔‘
کرپٹو کرنسی میں لین دین کے لیے رقوم کو کرپٹو کرنسی کی لین دین کرنے والی بین الاقوامی ویب سائٹ کوائن بیس اور Paxos کے ساتھ شراکت داری کے ذریعے USDP(Pax ڈالر) استعمال کرتے ہوئے منتقل کیا جاتا ہے۔ اس طریقے میں کرپٹو کرنسی کو چیٹ میں اٹیچمنٹ کی شکل میں بھیجا جاتا ہے اور اسے فوراً اپنے ڈیجیٹل اکاؤنٹ میں منتقل کیا جاسکتا ہے۔
واٹس ایپ کے ذریعے کرپٹو کرنسی بھیجنے یا وصول کرنے کے لیے نہ ہی کوئی حد متعین کی گئی ہے اور نہ ہی آپ کو اپنے Novi اکاؤنٹ میں کم از کم بیلنس رکھنے کی ضروت ہے جب کہ Novi اکاؤنٹ سے پیسوں کو اپنے بینک اکاؤنٹ میں منتقل کرنے پر بھی کوئی فیس لاگو نہیں کی گئی ہے۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News