اپوزیشن لیڈر سندھ اسمبلی حلیم عادل شیخ نے کہا ہے کہ ڈاکٹروں کے تبادلے اور معطلی صرف شو بازی ہے۔
تفصیلات کے مطابق اپنے جاری کردہ ایک بیان میں حلیم عادل شیخ کا کہنا تھا کہ چیف جسٹس کے ممکنہ دورہ تھرپارکر سے سندھ حکومت کی دوڑیں لگی ہوئی ہیں، ڈاکٹروں کے تبادلے اور معطلی صرف شو بازی ہے۔
ان کا کہنا تھا کہ دور دراز علاقوں میں علاج معالجے کی کوئی سہولت نہیں، مٹھی، چھاچھرو، اسلامکوٹ سمیت تمام اسپتال مریضوں کو علاج فراہم کرنے میں ناکام ہوچکی ہیں۔
انہوں نے کہا کہ تھرپارکر میں رواں سال بچوں کے مرنے کی تعداد 700 تک پہنچ چکی ہے، تھر کے آر او پلانٹس کو مصنوعی طریقے سے چلا کر چیف جسٹس کو دکھانے کی کوشش کی جائے گی۔
حلیم عادل شیخ کا کہنا تھا کہ آراو پلانٹ کی کرپشن کا پیسہ بلاول اور ایان علی کے جعلی اکاؤنٹس میں بھیجا گیا، سندھ حکومت نے تھرپارکر کے ہر منصوبے کو کمائی کا ذریعہ بنایا۔
انہوں نے کہا کہ تھرپارکر کی سول سوسائٹی اور صحافی چیف جسٹس سے ملاقات کر کے صورتحال بتائیں، کارونجھر میں جاری سرکاری سرپرستی میں پتھروں کی کٹائی پر بھی چیف جسٹس کو آگاہ کیا جائے۔
اپوزیشن لیڈر سندھ اسمبلی حلیم عادل شیخ کا مزید کہنا تھا کہ تھرپارکر کو تباہ کرنے والے کسی رعایت کے مستحق نہیں، پی پی کے وڈیرے ہر پکنک پوائنٹ کو ذاتی کے ٹی بنانا چاہتے ہیں۔
یہ بھی پڑھیں:
واضح رہے کہ اپوزیشن لیڈر سندھ اسمبلی حلیم عادل شیخ نے کہا تھا کہ سندھ حکومت نے بھٹو کے آئین کو پیپلز پارٹی کا آئین سمجھ لیا ہے ، پی پی نے سندھ اسمبلی کو غیر قانونی قوانین پاس کرنے کی فیکٹری بنا دیا ہے۔
ان کا کہنا تھا کہ سندھ حکومت فیڈریشن اور سپریم کورٹ سے جنگ کرنا چاہتی ہے، سندھ حکومت نے صوبے میں سویلین مارشل لاء لگا دیا ہے ، پی پی کے چند وڈیرے سندھ کی 6 کروڑ عوام کو اقلیت سمجھتے ہیں۔
حلیم عادل شیخ نے کہا تھا کہ سندھ بلدیاتی ایکٹ آئین کے آرٹیکل 140 اے کی خلاف ورزی ہے، کالے کرتوت والی پی پی سندھ کی عوام کو بنیادی حقوق سے محروم رکھنا چاہتی ہے، کالے قانون کے خلاف تحریک انصاف اور اتحادیوں کی جدوجہد مزید تیز ہو رہی ہے۔
اپوزیشن لیڈر سندھ اسمبلی نے کہا تھا کہ نوسرباز وزراء اپنے بیانات سے عوام اور میڈیا کو گمراہ کر رہے ہیں ، سندھ کی عوام پی پی کے جعلسازوں اور جھوٹوں کو پہچان چکی ہے۔
ان کا مزید کہنا تھا کہ دہرے نظام کے خلاف سندھ کی عوام اپنی بھرپور جدوجہد جاری رکھے گی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News