وزیر اعلیٰ پنجاب سردار عثمان بزدار نے کہا ہے کہ معصوم لوگوں کی زندگیوں سے کھیلنے والے درندوں کا کوئی مذہب نہیں۔

سردار عثمان بزدار نے کراچی کے علاقے شیر شاہ پراچہ چوک کے قریب دھماکے کی شدید مذمت کی اور وزیر اعلیٰ نے قیمتی انسانی جانوں کے ضیاع پر گہرے دکھ اور افسوس کا اظہار کیا۔

وزیراعلیٰ عثمان بزدار نے زخمی افراد کی جلد صحت یابی کیلئے دعا کی، ان کا کہنا تھا کہ پنجاب حکومت جاں بحق افراد کے لواحقین کے غم میں برابر کی شریک ہے، ہماری تمام تر ہمدردیاں جاں بحق افراد کے لواحقین اور زخمیوں کے ساتھ ہیں۔

عثمان بزدار کا کہنا تھا کہ دہشت گردی کے اس واقعے کی جتنی بھی مذمت کی جائے کم ہے، معصوم لوگوں کی زندگیوں سے کھیلنے والے درندوں کا کوئی مذہب نہیں، دہشت گرد اور ان کے سہولت کار پاک دھرتی کا بوجھ ہیں۔

وزیر اعلیٰ پنجاب سردار عثمان بزدار نے مزید کہا کہ قوم دہشت گردی کے ناسور کے مکمل خاتمے کے لئے پرعزم ہے، مٹھی بھر دہشت گردقوم کا حوصلہ پست نہیں کرسکتے۔

واضح رہے کہ کراچی میں نجی بینک کی عمارت میں دھماکا ہوا ہے جس کے نتیجے میں 14 افراد جاں بحق جبکہ متعدد زخمی ہوگئے ہیں۔

بول نیوز کے مطابق کراچی کے علاقے شیر شاہ میں پراچہ چوک کے قریب واقع ایک نجی بینک کی عمارت میں عین اس وقت دھماکا ہوا جب عملہ پیشہ وارانہ خدمات سرنجام دے رہا تھا، دھماکے کے وقت عوام کی بھی بڑی تعداد بھی موجود تھی۔

دھماکا اس قدر شدید تھا کہ ناصرف بینک کی دیواریں گر گئی بلکہ قریب واقع پیٹرول پمپ کو بھی کافی نقصان پہنچا، اس کے علاوہ اطراف کی عمارتوں کے بھی شیشے ٹوٹ گئے۔