وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا ہے کہ مریم اورنگزیب نے پی آئی ڈی اور وزارت اطلاعات کا پیسے کا غیر قانونی استعمال کیا۔

ڈاکٹر شہباز گل نے مریم اورنگزیب کے بیان پر شدید ردِ عمل دیتے ہوئے کہا کہ ن لیگ ضلعوں سے زیادہ جماعت نہیں رہی، نواز شریف بھارت جاتے تو  کشمیری رہنماؤں سے ملاقات تک نہیں کرتے تھے۔

ان کا کہنا تھا کہ مریم اورنگزیب الیکشن کمیشن ویب سائٹ پر جائیں عمران خان فتح یاب نظر آئیں گے، مریم اورنگزیب سمیت دیگر کا اس طرح رویہ رکھنے کی وجہ کیا ہے؟

وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا کہ ن لیگ نے خدمت کے عوض ترجمان رکھے ہیں، ن لیگ عورت کارڈ کھیل رہی ہے۔

واضح رہے کہ پاکستان مسلم لیگ (ن) کی ترجمان مریم اورنگزیب نے اپنے جاری کردہ ایک بیان میں کہا تھا کہ عمران خان ذہنی طور پر گھر جا چکے ہیں۔

انہوں نے کہا تھا کہ شہباز شریف کو اپوزیشن لیڈر نہ ماننے کی تمہاری کیا اوقات ہے، عمران خان جس حلقے سے جیتے وہاں تو جا کر دکھائیں، عوام کا ہاتھ اور آپ کا گریبان ہوگا ، سڑکوں پر آنے کے بعد امپائر کے سہاروں کی باتیں آپ کرتے تھے، عمران خان جس وقت سڑکوں پر آئے ملک ترقی کر رہا تھا۔

ان کا کہنا تھا کہ ہمارے دور کے منصوبوں پر تختیاں لگائی جا رہی ہیں ، آپ سڑکوں پر تھے تو ہم بجلی کے منصوبے لگا رہے تھے، نواز شریف و شہباز شریف دیگرعدالتوں سے سرخرو ہوئے۔

پاکستان مسلم لیگ (ن) کی ترجمان نے کہا تھا کہ عمران خان کے بدبودار انتقام کا سامنا کر چکے، سرخرو ہوئے ، عمران خان کے انتقام کا وقت گزر چکا ، عمران خان کہتے ہیں کسی کو نہیں چھوڑوں گا ، عمران خان نےعوام کو کسی قابل نہیں چھوڑا۔

انہوں نے کہا تھا کہ منتخب وزیر اعظم کو سڑکوں پر گھسیٹنے کی دھمکیاں دی گئی تھیں ، عمران خان نے وزیر اعظم کی کرسی کی تضحیک کی، عوام کے ووٹ سے آنے والےعوام کے پاس جاتے ہیں۔

مریم اورنگزیب کا کہنا تھا کہ وزیر اعظم کی کرسی پر بیٹھ  کرعوام کو دھمکیاں نہیں دی جاتیں ، اداروں کو دھمکیاں دینے کا مطلب ناکامی کا خوف ہے ، عمران خان نے ساڑھے 3 سال کی نااہلی کا جرم قبول کیا۔

ان کا کہنا تھا کہ وزیر اعظم سے درخواست ہے عوام کی جان چھوڑیں ،گھرجائیں، عمران خان کو معلوم ہو گیا گھر جانے کا وقت آچکا ، عمران خان ذہنی طور پر گھر جاچکے ہیں۔

پاکستان مسلم لیگ (ن) کی ترجمان مریم اورنگزیب نے مزید کہا تھا کہ عمران خان کی گزشتہ روز کی تقریر سے ثابت ہوا نااہل اور نالائق ہیں ، عمران خان کو 2018 میں آر ٹی ایس بٹھا کر مسلط کیا گیا ، وزیر اعظم عمران خان نے اداروں کو دھمکیاں دیں۔