بلوچستان کے مختلف علاقوں میں شدید برفباری کے باعث سڑکیں ٹریفک کیلئے بند کردی گئی ہیں۔

تفصیلات کے مطابق زیارت سنجاوی، اور زیارت ڈومیارہ روڈ برفباری کی وجہ سے ٹریفک کیلئے بند کردیا گیا ہے۔

ڈپٹی کمشنر زیارت حبیب نصیر کا کہنا ہے کہ عوام غیر ضروری سفر سے گریز کریں ، شدید برفباری کے باعث زیارت سنجاوی، اور زیارت ڈومیارہ روڈ کو ہر قسم ٹریفک کے لیے بند کر دیا گیا ہے۔

ڈی سی زیارت کے مطابق ضلعی انتظامیہ زیارت نے پی ڈی ایم اے نے کی بھاری مشینری کی مدد سے اسنو کلیئرنس آپریشن شروع کر دیا ہے۔

ڈپٹی کمشنر زیارت حبیب نصیر نے کہا ہے کہ زیارت سنجاوی روڈ سے برف ہٹانے کے بعد ٹریفک کے لیے کھول دیا جائے گا۔

واضح رہے کہ زیارت کوئٹہ میں شاہراہ ہر قسم ٹریفک کیلئے مکمل بحال ہے۔

دوسری جانب کہیں بارش و برفباری تو کہیں گرد آلود ہواؤں کے باعث ملک بھر میں جاتی سردی پھر لوٹ آئی ہے۔

محکمہ موسمیات کے مطابق آج  اسلام آباد کے مختلف علاقوں میں بارش کا سلسلہ جاری رہیگا جبکہ بارش کے باعث سردی کی شدت میں اضافہ بھی متوقع ہے۔

اسکے علاوہ پنجاب میں بھی تیز ہواؤں کے ساتھ بارش کا امکان ہے  تاہم ڈی جی خان، ملتان، لیہ، خانیوال،راجن پور،بہاولپور، اور بہاولنگر میں تیزہواؤں کے ساتھ ہلکی بارش کی توقع ہے۔

سندھ کی بات کی جائے تو آج  سندھ کے بیشتر اضلاع میں موسم خشک اور سرد رہے گا البتہ سکھر، خیرپور ، لاڑکانہ، جیکب آباد، شہید بینظیر آباد اور موہنجو داڑو کے چند مقامات پر بارش کا بھی امکان ہے۔