مری میں ایک بار پھر آج (بدھ) کی رات سے جمعرات تک برفباری متوقع ہے۔

چیف ٹریفک آفیسر راولپنڈی وسیم ریاض نے اپنے بیان میں کہا کہ متوقع برفباری کے پیش نظر ٹریفک انتظامات مکمل کر لیے گئے ہیں۔

انہوں نے کہا کہ ٹریفک کی بلا رکاوٹ روانی کےلئے اضافی نفری تعینات کردی گئی ہے جبکہ ضلعی انتظامیہ کے احکامات کے پیش نظر مری میں سیاحوں کی 8000 گاڑیوں کی اجازت ہے۔

وسیم ریاض نے بتایا کہ مری میں سیاحوں کی ابتک 1485 گاڑیاں موجود ہیں۔

سی ٹی او کے مطابق مری کے داخلی راستوں پر سیاحوں کو آگاہی و احتیاطی پمفلٹ تقسیم کیے جارہے ہیں اور ریڈیو اسٹیشن 88.6 کے ذریعے بھی مری کے حوالے سے آگاہی فراہم کی جارہی ہے۔

سی ٹی او کا کہنا ہے کہ مری جانے والے سیاح موسم کی شدت اور رش کی صورتحال کو مد نظر رکھ کر مری کا سفر کریں اور کسی قسم کی رہنمائی اور مدد کی صورت میں ہیلپ لائن 0519269200 یا 03097770598پر رابطہ کریں۔

مغربی ہواؤں نے پاکستان کا رخ کر لیا

محکمہ مو سمیات کے مطابق آج شام تک مغربی ہوائیں پاکستان پہنچ جائیں گی، ملک کے مختلف حصوں میں بدھ کی رات اور جمعرات کو گرج چمک کے ساتھ موسلادھار بارش کا بھی امکان ہے۔

تیز ہواؤں کا بلوچستان کے سمندری علاقوں میں زیادہ اثر ہوگا، بلوچستان کےساحلی علاقوں میں ہوا کی رفتار 30 سے 35  ناٹیکل میل ہو سکتی ہے۔

محکمہ مو سمیات کے مطابق سندھ اور بلوچستان میں درجہ حرارت 3 سے 5 ڈگری رہے گا۔

ڈائریکٹر محکمہ موسمیات سردار سرفراز نے کہا کہ ماہی گیر کھلے سمندر میں جاتے ہوئے احتیاط کریں۔

ملک کے مختلف حصوں میں بارشیں ہی بارشیں

کل سےاسلام آباد، اٹک، چکوال، گلگت بلتستان، سوات ، مالا کنڈ ، پشاور، چار سدہ، کوہاٹ، میانوالی، سرگودھا، جھنگ خوشاب اور ساہیوال میں گرج چمک کے ساتھ بارش کا امکان ہے۔

کشمیر، جہلم، منڈی بہاؤ الدین، حافظہ آباد، گوجرانوالہ، گجرات، سیالکوٹ، لاہور اور قصور میں بھی گرج چمک کے ساتھ موسلا دھار بارش ہو سکتی ہے۔

محکمہ مو سمیات کے مطابق بدھ کی شام مری، نیلم ، حویلی، استور اور ہزارہ میں برفباری متوقع ہے۔

بدھ اور جمعرات کو مکران کی ساحلی پٹی اور صوبہ سندھ میں آندھی، تیز ہوائوں کے ساتھ بارش کا امکان ہے۔