صدر مملکت ڈاکٹر عارف علوی کی جانب سے کانگو میں ہیلی کاپٹر حادثے پر اظہار افسوس کیا گیا ہے۔

صدر پاکستان نے ہیلی کاپٹر کریش میں شہید ہونے والوں کیلئے گہرے رنج و غم کا اظہار کرتے ہوئے ان کے بلندی درجات کی دعا کی ہے۔

ڈاکٹر عارف علوی کی جانب سے  اقوام متحدہ کے امن مشن میں خدمات انجام دینے والوں کو خراج عقیدت بھی پیش کیا گیا ہے۔

صدر مملک نے شہیدوں کے  اہل خانہ سے اظہار ہمدردی کرتے ہوئے ان کے لئے صبر جمیل کی دعا بھی ہے۔

آئی ایس پی آر کی جانب سے جاری کردہ بیان کے مطابق کانگو میں اقوام متحدہ امن مشن میں تعینات پاک فوج کے آرمی ایوی ایشن کا پیوما ہیلی کاپٹر گر کر تباہ ہوگیا جس میں 6 پاکستانی افسروں،جوانوں سمیت اقوام متحدہ امن مشن کے 8 پیس کیپر نے عالمی امن کی خاطر جان کی قربانی دی۔

آئی ایس پی آر کے مطابق پاک فوج آرمی ایوی ایشن یونٹ 2011 سے اقوام متحدہ امن مشن میں فرائض کی انجام دہی میں مصروف ہے۔

آئی ایس پی آر کا کہنا ہے کہ شہداء میں پائلٹ لیفٹیننٹ کرنل آصف علی اعوان، میجر سعد نعمانی شامل ہیں جبکہ میجر فیضان علی، نائب صوبیدار سمیع اللہ، فلائٹ انجینئر حوالدار محمد اسمعیل، کریو چیف محمد جمیل واقعے میں شہید ہوئے۔

آئی ایس پی آر کا مزید کہنا ہے کہ ہیلی کاپٹر کریش کی وجوہات کا ابھی علم نہیں ہو سکا۔