پی ڈی ایم کے ترجمان حافظ حمداللہ نے کہا ہے کہ 27 مارچ کو اگر کچھ ہوا تو ذمہ دار شیخ رشید اورعمران نیازی ہونگے۔

ترجمان حافظ حمداللہ نے اپنے جاری کردہ بیان میں کہا کہ پارلیمنٹ لاجز میں اراکین اسمبلی حکومتی دہشت گردی کی وجہ سے غیرمحفوظ ہے۔

انہوں نے کہا کہ کل تک عمران خان جن کو ٹائیگر کہتے تھے آج ان کو گھوڑے گدھے اور خچر کہتے ہیں، جب جہاز بھر بھر کےلایا جارہا تھا، باضمیر تھے مگر آج عمران نیازی ان کو بےضمیر کہتے ہیں۔

حافظ حمداللہ نے کہا کہ اسمبلی اجلاس بلاکر ملتوی کرنے کا بیان دینا اسد قیصر کے جانبدار ہونے کا ثبوت ہے، اسد قیصر روز اول سے متنازع اور سرکاری پارٹی کا اسپیکر ہے وہ ایوان زیریں کا نہیں بنی گالہ کا اسپیکرہے۔

پی ڈی ایم کے ترجمان کا کہنا ہے کہ عمران نیازی آپ کے اپنے اراکین اسمبلی اور اتحادی ساتھ نہیں دے رہے، عمران خان آپ اکثریت کھو چکے ہیں اب آپ کو وزارت عظمیٰ کی منصب پر رہنے کا کوئی جواز باقی نہیں رہا۔

حافظ حمداللہ نے کہا کہ استعفیٰ دیکر گھر چلے جائیں ورنہ انار کی اور خانہ جنگی کا ذمہ دار آپ ہونگے، شیخ رشید آپ چیختے رہیں، بھونکتے رہیں اب آپ اور عمران نیازی کے حصے میں چیخنے اور بھونکنے کے سواکچھ نہیں ہے۔

انہوں نے مزید کہا کہ 27 مارچ کو اگر کچھ ہوا تو ذمہ دار شیخ رشید اورعمران نیازی ہونگے، پی ڈی ایم سندھ میں گورنرراج کے نفاذ کی تجویز کی شدید الفاظ میں مسترد اور جوتے کی نوک پہ رکھتی ہے۔