روٹیاں گھر میں آپ سب ہی بناتے ہیں اور یقیناً سب کو بنانی آتی بھی ہوں گی لیکن جب بازار سے چپاتی منگواتے ہیں تو اس کا ذائقہ ہی الگ ہوتا ہے کیونکہ ماہر نانبائی کا روٹی بنانے کا طریقہ تھوڑا الگ ہوتا ہے جس سے روٹی کا ذائقہ مزید اچھا ہوجاتا ہے۔

ماہر نانبائی روٹی کو نرم کیسے بناتے ہیں؟ آئیں جانتے ہیں۔

آٹا گوندھنے کا طریقہ

ایک پیالے میں حسبِ ضرورت آٹا لیں اس میں تھوڑا سا نمک، ایک چمچ آئل اور تھوڑا سا میدہ شامل کرلیں یعنی تین کپ آٹا ہے تو اس میں آدھا کپ میدہ ڈال لیں اور اس آٹے کو پانی کی مدد سے گوندھیں لیکن آٹے کو نرم نہ گوندھیں بلکہ تھوڑا سا سخت ہی رکھیں اور آدھے گھنٹے تک ڈھک کر فریج کے بغیر رکھ دیں۔

روٹی بنانے کا طریقہ

ہتھیلی پر تھوڑا سا آئل لگائیں اور آٹا لے کر پیڑا بنالیں اور روٹی کو اچھی طرح بیل لیں پھر اس کو توے پر ڈالیں اور جیسے ہی روٹی کی اوپری سطح پر ایک سے دو چھوٹے غبارے بننے لگیں یا آپ کو اندازہ ہو کہ نیچے سے پک گئی ہے تو سائیڈ بدل لیں اور جہاں سے روٹی پھولتی جائے وہاں کپڑے کی مدد سے اس کو دباتی جائیں آہستہ آہستہ روٹی پوری پھول جائے گی ۔

لیجئیے ہوگئی آپ کی بازار جیسی مزیدار اور نرم سی روٹی تیار۔

اب ایک مرتبہ روٹی پر تھوڑے سے آئل کا اسپرے کردیں اور ساری روٹیاں بنانے کے بعد ان کے اوپر کاغذ رکھ کر ڈھک دیں۔

اس طرح سے آپ کی روٹی سخت بھی نہیں پڑے گی اور دن بھر کے لئے نرم رہے گی۔