وائس چیئرمین پی ٹی آئی مخدوم شاہ محمود قریشی نے کہا ہے کہ پی ٹی آئی سیاسی انداز میں ضمنی انتخابات میں مقابلہ کرے گی۔

سابق وزیر خارجہ شاہ محمود قریشی نے ملتان میں  میڈیا سے گفتگو کرتے ہوئے کہا کہ میں آج پنجاب کے بجٹ پر بات کرنا چاہتا ہوں۔

انہوں نے کہا کہ میں پنجاب کا دو دفعہ وزیر خزانہ رہا ہوں اور پنجاب کا وزیر خزانہ بجٹ پیش کرنے میں ناکام رہا ہے۔

شاہ محمود قریشی نے کہا کہ گورنر نے اجلاس ایوان اقبال میں طلب کیا ایسا ماضی میں کبھی نہیں ہوا، جب اسپیکر موجود ہے تو ڈپٹی اسپیکر کی زیر صدارت اجلاس کیوں ہورہا ہے؟

وائس چیئرمین پی ٹی آئی کا کہنا ہے کہ گورنر غیر آئینی اقدامات کیوں اٹھا رہے ہیں؟ اس طریقے سے بجٹ پاس کروایا گیا وہ غیر آئینی ہوگا۔

انہوں نے کہا کہ میں پنجاب حکومت سے کہتا ہوں اپنے فیصلہ پر نظر ثانی کریں، مسئلہ یہ ہے ایوان چیف سیکرٹری اور آئی جی پنجاب سے 25 مئی کو جو ہوا اس پر وضاحت چاہتا تھا، 25 مئی کو چادر اور چار دیواری کو پامال کیا گیا۔

شاہ محمود نے کہا کہ جھوٹے مقدمات ختم ہو جائیں تو معاملات بہتر ہو سکتے ہیں، پی ٹی آئی سیاسی انداز میں ضمنی انتخابات میں مقابلہ کرے گی، ضمنی انتخابات میں سرکاری مشینری کا استعمال کیا جا رہا ہے اور اسکا استعمال غیر مناسب ہے۔

سابق وزیر خارجہ کا کہنا ہے کہ لوگوں کو عہدوں کا لالچ دے کر سیاسی وفاداریاں تبدیل کروائی جا رہی ہیں، انتخابی ضابطہ اخلاق کی خلاف وزریاں کی جارہی ہیں۔

انہوں نے مزید کہا کہ پی ٹی آئی کے فنڈز کے منصوبوں پر مسلم لیگ ن کی تختیاں مناسب نہیں ہیں، ڈپٹی اسپیکر حکومت کے آلہ کار نہ بنیں ایسا نہ ہوکہ کل شرمندگی ہو۔