شہری مہنگائی کے ہاتھوں خوار ہو گئے اور ماہانہ اخراجات کنٹرول سے باہر ہو گئے ہیں جب کہ گزشتہ 24 گھنٹوں کے دوران ایل پی جی کی قیمتوں میں دوسری مرتبہ اضافہ کر دیا گیا۔

تفصیلات کے مطابق گزشتہ 24 گھنٹوں کے دوران ایل پی جی کی قیمت میں دوسری مرتبہ اضافہ کیا گیا جس کے بعد ایل پی جی 220 روپے سے بڑھا کر 240 روپے کلو کر دی گئی۔

ایل پی جی کا گھریلو سلنڈر 235 روپے اضافے کے بعد 2600 روپے سے بڑھ کر 2835 روپے ہو گیا ہے  جب کہ کمرشل سیلنڈر کی قیمت 455 روپے اضافے سے 10900 روپے ہو گئی ہے۔

گلگت میں ایل پی جی 300 روپے فی کلو کی بلند ترین سطح پر پہنچ گئی ہے، اور گھریلو سیلنڈر 3600 میں فروخت کیا جا رہا ہے۔ گلگت میں کمرشل سیلنڈر کی قیمت 13600 روپے کر دی گئی ہے، جس سے شہریوں میں بے چینی پائی جاتی ہے۔

چیئرمین ایل پی جی انڈسٹریز ایسوسی ایشن عرفان کھوکھر کا کہنا ہے کہ اوگرا کے نوٹی فیکیشن کے مطابق ایل پی جی کی قیمت 220 روپے مقرر کی گئی جب کہ بلیک مارکیٹنگ عروج پر پہنچ گئی ہے اور ایل پی جی پیداواری کمپنیاں قیمتیں مزید بڑھانے کے لیے تیار ہیں۔

عرفان کھوکھر نے اعلان کیا اگر حالات یونہی رہے تو اور قیمتیں کنٹرول نہ کی گئی تو ملک گیر ہڑتال اور وزات پٹرولیم کے سامنے دھرنا دیں گے۔