معروف کرکٹ کمنٹیٹر سائمن ڈول نے پاکستان کرکٹ بورڈ کے اعلیٰ حکام پر زور دیا ہے کہ وہ کرکٹ پچز کے انتظام میں مداخلت نہ کریں.

مقامی میڈیا رپورٹس کے مطابق سائمن ڈول نے پاکستان کرکٹ بورڈ کے اعلیٰ حکام پر زور دیتے ہوئے کہا کہ گراؤنڈ اسٹاف کے کام میں مداخلت نہ کریں اور انہیں اپنا کام کرنے دیں۔

واضح رہے کہ انگلینڈ اور نیوزی لینڈ کے خلاف ہوم ٹیسٹ سیریز کے لیے بنائی جانے والی بیٹنگ پیراڈائز اور بے جان پچز کی وجہ سے پی سی بی پر کافی تنقید کی گئی تھی۔

نیوزی لینڈ کے خلاف پہلے ٹیسٹ کے لیے فلیٹ پچ نے مزید تنقید کو جنم دیا تھا جس کے بعد عبوری چیف سلیکٹر شاہد آفریدی نے کہا تھا کہ دوسرے ٹیسٹ کے لیے سپورٹنگ اور جاندار پچ تیار کی جائے گی۔

پاکستان اور نیوزی لینڈ کے درمیان جاری دوسرے ٹیسٹ کے دوران ڈول نے کہا کہ بورڈ کے کرتا دھرتا کو اپنی ناک نیچے کرنی ہو گی۔

کمنٹیٹر سائمن ڈول دوسرے ٹیسٹ میں پچ سے مایوس ہوئے اور انہوں نے مزید جاندار وکٹوں کی حوصلہ افزائی کی تاکہ پاکستانی بولرز اس سے فائدہ اٹھا سکیں۔

سائمن ڈول کا کہنا تھا کہ پچ پر کوئی گھاس نہیں ہے یہ پچز بولرز کے کیرئیر سے کھیلنے کے مترادف ہے۔

“سائمن نے متنبہ کیا کہ اگر آپ اس قسم کی بے جان پچز تیار کرنے جا رہے ہیں تو آپ کھلاڑیوں سے وہی کام کرنے کی توقع نہیں کر سکتے جو وہ فرسٹ کلاس لیول پر کر رہے ہیں۔

سائمن ڈول نے فرسٹ کلاس اور ٹیسٹ دونوں میچوں کے لیے ایک جیسی وکٹوں کی حوصلہ افزائی کرتے ہوئے کہا، “یہ باؤلرز کی مدد کرے گا اور پاکستان کرکٹ کی مدد کرے گا۔”

یاد رہے کہ پاکستان اور نیوزی لینڈ کے درمیان دو میچوں کی ٹیسٹ سیریز کا پہلا میچ ڈرا ہو گیا تھا جبکہ دوسرا ٹیسٹ بھی ڈرا کی جانب گامزن ہے۔