ارشد شریف قتل ازخود نوٹس میں عدالتِ عظمٰی نے گزشتہ روزکی سماعت کا تحریری حکم نامہ جاری کردیا۔

تفصیلات کے مطابق چیف جسٹس پاکستان سپریم کورٹ نے بول نیوزکے سینئراینکراورمعروف صحافی شہید ارشد شریف قتل از خود نوٹس کا گزشتہ روز کی سماعت کا تحریری حکم نامہ جاری کر دیا۔

چیف جسٹس پاکستان عمر عطا بندیال نے 2 صفحات پر مشتمل حکم نامہ تحریر کیا ہے۔

سپریم کورٹ نے تحریری حکم نامے میں کہا کہ ایڈیشنل اٹارنی جنرل نے عدالت میں جمع کرائی گئی رپورٹ سے آگاہ کیا۔ رپورٹ کے مطابق اب تک 41 گواہان کے بیانات ریکارڈ کیے گئے۔

چیف جسٹس عمر عطا بندیال نے تحریری حکم نامے میں کہا کہ قتل کی تحقیقات پاکستان، یو اے ای اور کینیا میں کی جارہی ہیں۔ کینیا اور یو اے ای سے باہمی قانونی تعاون کیلئے حکومت نے خط لکھ دیا ہے۔

عدالتِ عظمٰی نے تحریری حکم نامے میں یہ بھی کہا کہ امید ہے اسپیشل جے آئی ٹی تیاری کے ساتھ یو اے ای اور کینیا جائے گی۔

سپریم کورٹ نے تحریری حکم نامے میں مذید کہا کہ ایڈیشنل اٹارنی جنرل نے اگلی رپورٹ جمع کرانے کیلئے ایک ماہ کی مہلت طلب کی۔ کیس کی مزید سماعت فروری کے پہلے ہفتے میں ہوگی۔

گذشتہ روز سماعت کے دوران چیف جسٹس پاکستان نے ہدایت کی کہ دبئی سے کن حالات میں ارشد شریف کینیا گئے وہ بھی تحقیقات ہوں۔ بنیادی معاملہ ارشد شریف کا قتل ہے اس کی تمام پہلوؤں سے تحقیقات کی جائیں۔

گذشتہ روز کی سماعت کا احوال پڑھیں