سابق صدر پرویز مشرف کا جسد خاکی لیکر خصوصی طیارہ کراچی پہنچ گیا۔

سابق صدر جنرل پرویز مشرف کا جسد خاکی کے ساتھ خصوصی طیارے نے کراچی ایرپورٹ پر لینڈ کیا، سابق آرمی چیف کی میت کو مکمل فوجی اعزاز کے ساتھ ملیر کینٹ منتقل کیا جائے گا ۔ کراچی ایرپورٹ کے اطراف پاک فوج کے خصوصی دستے تعینات ہیں۔

خصوصی طیارے میں سابق صدر کی اہلیہ صہبا مشرف، صاحبزادے بلال مشرف اور صاحبزادی بھی ساتھ آئیں گی۔

سابق صدر پرویز مشرف کی میت کو غسل دے کر ائیرپورٹ روانہ کردیا گیا۔ ان کی میت کو دبئی کے علاقے میں سونا پور میں غسل دیا گیا تھا۔

یہ بھی پڑھیں؛ پرویز مشرف کے انتقال پر شوبز شخصیات کی تعزیت

سابق صدر کی نمازجنازہ کل دوپہر ایک بج کر 45 منٹ پر کراچی میں ادا کی جائے گی، ان کی نمازجنازہ پولوگراؤنڈ ملیر کینٹ میں ادا کی جائے گی۔

خیال رہے کہ دبئی میں گزشتہ روز انتقال کر جانے والے سابق صدر جنرل ریٹائرڈ پرویز مشرف کی میت دبئی کے مقامی اسپتال کے مردہ خانے میں رکھی گئی ہے۔

اس سے قبل سابق صدر جنرل ریٹائرڈ پرویز مشرف کی میت پاکستان منتقلی کے لیے پاکستانی سفارتی حکام اور اماراتی حکام کا رابطہ ہوا تھا اور ان میت کو پاکستان لانے کے لئے متحدہ عرب امارات نے اپنا طیارہ حوالے کردیا۔

واضح رہے کہ سابق صدر اور آرمی چیف جنرل ریٹائرڈ پرویز مشرف اتوار کی صبح دبئی میں انتقال کرگئے تھے، ان کی عمر 79 برس تھی۔ پرویز مشرف اعضاء کی خرابی کی بیماری (ایمیلوئیڈوسس) میں مبتلا اور 18 مارچ 2016ء سے دبئی کے امریکی اسپتال میں زیرِ علاج تھے۔