سابق وزیراعظم عمران خان کا کہنا ہے کہ قوم دیکھ رہی ہے کہ الیکشن سے فرار کے لیے عدلیہ پر دباؤ ڈالا جارہا ہے، عدلیہ پر دباؤ ڈالنے کے لیے بل جلد بازی میں پیش کیا گیا۔ 

قومی اسمبلی میں عدلیہ مخالف بل پیش ہونے پر رد عمل دیتے ہوئے چیئرمین پی ٹی آئی عمران خان نے کہا کہ ہم بھی چاہتے ہیں، عدالتوں میں ریفارمز ہوں لیکن حکومت کی نیت پر شک ہے، شہباز شریف نے جلد بازی میں فیصلہ کیا اور بل پیش کیا۔

انہوں نے کہا کہ ملک میں جو ہورہا ہے ، الیکشن چاہنے والی پارٹی ایسا نہیں چاہے گی اور یہ لوگ بھی عدلیہ کو آزاد نہیں دیکھنا چاہتے، قوم دیکھ رہی ہے کہ الیکشن سے فرار کے لیے عدلیہ پر دباؤ ڈالا جارہا ہے، عدلیہ پر دباؤ ڈالنے کے لیے بل جلد بازی میں پیش کیا گیا۔

اس سے قبل پاکستان تحریک انصاف کراچی کے صدر آفتاب صدیقی کی سربراہی میں وفد نے چیئرمین پی ٹی آئی عمران خان سے زمان پارک میں ملاقات کی۔ ملاقات میں پی ٹی آئی کراچی کے جنرل سیکریٹری ارسلان تاج اور رکن صوبائی اسمبلی شاہنواز جدون بھی موجود تھے۔

آفتاب صدیقی نے چیئرمین عمران خان کو کراچی میں جاری امپورٹڈ حکومت کی انتقامی کارروائیوں سے تفصیلی طور پر آگاہ کیا، چیئرمین عمران خان نے انتقامی کارروائیوں کا شکار ارسلان تاج اور شاہنواز جدون کی ہمت اور حوصلے کو سراہا۔

ملاقات میں عمران خان نے کراچی میں عام انتخابات کی تیاری کیلئے اہم ٹاسک دیتے ہوئے کہا کہ کراچی میں انسانی حقوق کی خلاف ورزیوں پر سیمنار منعقد کیے جائیں گے۔

اس موقع پر عمران خان نے کہا کہ پیپلز پارٹی، ن لیگ سرکار ایک ہی تھالی کے چٹے بٹے ہیں، کراچی میں پی ٹی آئی کارکنان کے گھروں پر چھاپے گرفتاریاں انسانی حقوق کی پامالی ہے۔

عمران خان کا کہنا تھا کہ ملک میں آئین کی کھلی خلاف ورزیوں کا عمل جاری ہے، کراچی والے حقیقی آزادی کی تحریک میں ہمیشہ آگے رہے،  ظلم و جبر کے باوجود ڈٹے رہنے پر کراچی کے عوام کو خراج تحسین پیش کرتا ہوں۔