فرانس کے دارالحکومت پیرس میں ہزاروں افراد نے ‘غزہ میں قتل عام بند کرو’ کے نعرے کے تحت مظاہرہ کیا۔

عرب میڈیا کے مطابق بائیں بازو کے منتظمین نے فرانسیسی حکومت سے مطالبہ کیا کہ وہ اسرائیل اور حماس کے عسکریت پسندوں کے درمیان فوری جنگ بندی کا مطالبہ کرے۔

انجنیئر اہلم تریکی نے اپنے کندھوں پر فلسطینی پرچم لہراتے ہوئے کہا کہ میں غزہ میں جنگ بندی کے لیے فلسطینی کاز کی حمایت کرنے آئی تھی۔

اسرائیلی حکام کے مطابق 7 اکتوبر کو حماس کے حملے میں اسرائیل میں تقریبا 1200 افراد ہلاک ہوئے جن میں زیادہ تر عام شہری تھے اور 239 افراد کو یرغمال بنا لیا گیا تھا۔

حماس کے زیر انتظام وزارت صحت کے مطابق اس کے جواب میں اسرائیلی فضائی اور زمینی فوجی کارروائی میں غزہ میں 11 ہزار سے زائد افراد فلسطینی شہید ہو چکے ہیں۔

ٹریڈ یونین کے 85 سالہ کارکن کلاڈ مارل نے کہا کہ یہ بنیادی بات ہے کہ کارکن یا سادہ شہری کی حیثیت سے آپ فلسطینی عوام کی حمایت کے لیے سڑکوں پر نکلیں۔

فرانس کے رکن پارلیمنٹ میتھیلڈ پینوٹ اور ایرک کوکیریل، جن کی بائیں بازو کی جماعت فرانس انباؤڈ (ایل ایف آئی) کو یہود دشمنی کے بارے میں مبہم موقف کی وجہ سے تنقید کا نشانہ بنایا گیا ہے، مارچ میں موجود تھے۔

مارسیل میں تقریبا 1300 افراد کے مظاہرے کے موقع پر ایل ایف آئی کے کوآرڈینیٹر مینوئل بومپرڈ نے کہا کہ قتل عام کے پیش نظر مظاہرہ کرنا ضروری ہے۔

پولیس اور عینی شاہدین کے مطابق غزہ میں باقاعدگی سے کام کرنے والے ایک سرجن کی دو کتابوں کی تشہیر کے لیے منعقد ہونے والی فلسطینی تقریب پر انتہائی دائیں بازو کے عسکریت پسندوں نے حملہ کر دیا جس کے نتیجے میں کم از کم تین افراد معمولی زخمی ہو گئے۔

مصنف کرسٹوف اوبرلائن نے خبر رساں ادارے کو بتایا کہ لاٹھیوں سے لیس اس گروپ نے ہال کا دروازہ توڑنے کی کوشش کی لیکن وہ اندر داخل ہونے میں ناکام رہا۔

آرگنائزر جیروم فینر کا کہنا ہے کہ یہ حملہ انتہائی دائیں بازو کی جانب سے کیا گیا اور ان کے پاس لوہے کی سلاخیں اور شیشے کی بوتلیں بھی تھیں۔

پولیس نے کہا کہ ایک شخص کو گرفتار کیا گیا ہے اور انہوں نے تشدد کی شدید مذمت کی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں