آئی سی سی ون ڈے ورلڈ کپ 2023 کے فائنل میں آسٹریلیا نے بھارت کو 6 وکٹوں سے شکست دے کر چھٹی بار عالمی اعزاز اپنے نام کر لیا۔
احمد آباد کے نریندر مودی کرکٹ اسٹیڈیم میں ہونے والے آئی سی سی ورلڈ کپ 2023 کے فائنل میں آسٹریلیا نے بھارت کا 241 رنز کا ہدف 4 وکٹوں کے نقصان پر 47 اوورز میں حاصل کر لیا۔
کرکٹ کی تاریخ میں آسٹریلیا پہلا ملک بن گیا ہے جس نے 6 مرتبہ یہ عالمی اعزاز اپنے نام کیا ہے۔
بھارت کے 241 کے ہدف کے تعاقب میں آسٹریلیا کا آغاز اچھا نہ تھا، دوسرے ہی اوور میں محمد شامی نے ڈیوڈ وارنر کو آؤٹ کر دیا۔
مچل مارش بھی 15 رنز بنا کر 47 کے مجموعی اسکور پر پویلین واپس لوٹ گئے۔ جبکہ اسمتھ بھی 4 رنز پر بمرا کو وکٹ دے بیٹھے۔
ایسے میں آسٹریلیا کے ٹریوس ہیڈ اور مارنس لبوشین نے ٹیم کو سنبھالا اور ذمہ داری کے ساتھ بیٹنگ کی، دونوں کے درمیان 192 رنز کی پارٹنر شپ قائم ہوئی۔
ٹریوس ہیڈ نے میگا ایونٹ کے فائنل میں سنچری بنانے کا اعزاز حاصل کیا انہوں نے 137 رنز کی اننگ کھیلی جس میں 4 چھکے اور 15 چوکے شامل تھے۔
مارنس لبوشین 58 رنز پر ناقابل شکست رہے، جبکہ گلین میکسویل 2 رنز پر ناٹ آؤٹ تھے۔
ورلڈ کپ میں اپنی دھاک بٹھانے والے اور ٹیموں کو کم اسکور پر آؤٹ کرنے والے بھارتی بولرز فائنل میں بنا دانت کے شیر دکھائی دیئے، جسپریت بمرا نے 2 جبکہ محمد شامی اور محمد سراج نے ایک، ایک کھلاڑی کو آؤٹ کیا۔
اس سے قبل آسٹریلیا نے ٹاس جیت کر بھارت کو پہلے بیٹنگ کی دعوت دی، آئی سی سی ورلڈکپ 2023 کے فائنل میں بھارت نے آسٹریلیا کو جیت کے لیے 241 رنز کا ہدف دیا ہے۔
بھارت کے شہر احمد آباد کے نریندر مودی اسٹیڈیم میں ہونے والے ورلڈکپ 2023 کے سب سے بڑے معرکے میں بھارت کی بیٹنگ لائن پچھلے میچوں کی طرح پرفارم نہیں کرسکی اور پوری ٹیم آخری اوور میں 240 رنز پر آؤٹ ہوگئی۔
آسٹریلیا کے کپتان پیٹ کمنز نے ٹاس جیت کر پہلے بھارت کو بیٹنگ کی دعوت دی۔ روہت شرما نے ہمیشہ کی طرح ٹیم کو جارحانہ آغاز فراہم کیا لیکن وہ 47 رنز بنانے کے بعد اپنی وکٹ گنوا بیٹھے جب کہ ورلڈکپ کے دوران بابراعظم سے پہلی پوزیشن چھیننے والے شبمن گل صرف 4 رنز کے مہمان ثابت ہوئے۔
ورلڈکپ کے ٹاپ اسکورر اور ون ڈے کرکٹ میں سب سے زیادہ 50 سنچریاں بناکر سچن ٹنڈولکر کا ریکارڈ توڑنے والے ویرات کوہلی نے اپنی فارم کو جاری رکھتے ہوئے نصف سنچری اسکور کی، وہ 54 رنز بناکر آؤٹ ہوئے۔
بھارت کے ایک اور ان فارم بلے باز شریئس ایئرناکام رہے وہ صرف 4 رنز بنانے کے بعد پویلین واپس لوٹ گئےتاہم کے ایل راہل نے ذمہ دارانہ بیٹنگ کا مظاہرہ کرتے ہوئے نصف سنچری اسکور کی۔ وہ 66 رنز بناکر آؤٹ ہوئے۔
روینڈرا جڈیجا 9، سوریا کمار یادو 18، محمد شامی6، جسپرت بمرا، ایک اور کلدیب یادو 10 رنز بناکر آؤٹ ہوئے۔
آسٹریلیا کی جانب سے مچل اسٹارک نے 3، جوش ہیزل ووڈ اور پیٹ کمنز نے 2،2 جب کہ ایڈم زمپا اور گلین میکسویل نے ایک ایک وکٹ حاصل کی۔
خیال رہے کہ آئی سی سی ورلڈ کپ 2023 کا فائنل کھیلنے والی بھارتی ٹیم ایونٹ میں ناقابل شکست رہی ہے، وہ پہلے مرحلے کے تمام 9 میچز جیتنے کے بعد سیمی فائنل میں نیوزی لینڈ کو شکست دینے میں کامیاب رہی۔
دوسری جانب آسٹریلیا ابتدائی دونوں میچز جیتنے کے بعد تمام میچز میں فاتح رہی اور سیمی فائنل میں جنوبی افریقا کو انتہائی دلچسپ مقابلے کے بعد ایونٹ سے باہر کردیا تھا۔
اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں
ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں
پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں اور بیل آئیکن پر کلک کریں
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News