بھارتی ٹیم کے سابق کپتان ویرات کوہلی کی جانب سے وائٹ بال کرکٹ سے عارضی طور پر وقفہ لینے کا امکان ہے۔
بھارت میں ہونے والے آئی سی سی ون ڈے ورلڈکپ میں متعدد ریکارڈ اپنے نام کرنے والے بھارت کے سابق کپتان ویرات کوہلی نے ورلڈکپ کے بعد کچھ دنوں کے لیے کرکٹ سے وقفہ لیا ہوا ہے اور وہ ان دونوں اپنی اہلیہ انوشکا شرما کے ہمراہ لندن میں چھٹیاں منارہے ہیں۔
دوسری جانب بھارت کی جنوبی افریقا کے خلاف وائٹ بال سیریز بھی شروع ہونے جارہی ہے تاہم امکان ظاہر کیا جارہا ہے کہ ویرات کوہلی اس سیریز میں ٹیم کو دستیاب نہیں ہوں گے کیوں کہ انہوں نے عارضی طور پر کرکٹ سے بریک لینے کا فیصلہ کیا ہے۔
بھارتی میڈیا رپورٹس میں دعویٰ کیا گیا ہے کہ اسٹار بلے باز ویرات کوہلی صرف ٹیسٹ سیریز کا حصہ ہوں گے اور اس حوالے سے سابق کپتان نے اپنے فیصلے سے بھارتی کرکٹ بورڈ کو بھی آگاہ کردیا ہے۔
رپورٹ میں بتایا گیا ہے کہ ویرات کوہلی نے بورڈ سے وائٹ بال سیریز سے بریک لینے کی بات کی ہے تاہم وہ باکسنگ ڈے سے سنچورین میں شروع ہونے والے پہلے ٹیسٹ کا حصہ ہوں گے۔
میڈیا رپورٹس کے مطابق بھارتی کرکٹ ٹیم کے کپتان روہت شرما کی بھی دستیابی کے بارے میں ابھی کچھ واضح نہیں ہے، وہ بھی انگلینڈ میں چھٹیاں منا رہے ہیں۔ بھارتی بورڈ کے سیکرٹری جے شاہ جلد روہت شرما سے ان کے وائٹ بال کرکٹ کے مستقبل پر بات کریں گے۔
خیال رہے کہ دورہ جنوبی افریقا میں 2 ٹیسٹ، 3 ون ڈے اور 3 ٹی ٹوئنٹی میچز کی سیریز شامل ہے۔ جنوبی افریقا اور بھارت کے درمیان 3 ٹی ٹوئنٹی میچز کی سیریز 10 دسمبر سے ڈربن میں شروع ہو گی۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News