فرانس کے شہر مارسیل میں معروف فاسٹ فوڈ کے پارکنگ ایریا میں فائرنگ کے نتیجے میں دو افراد ہلاک ہو گئے ہیں۔

بھارتی میڈیا کے مطابق مارسیل کے چیف پراسیکیوٹر نکولس بیسن نے بتایا کہ پانچ افراد فاسٹ فوڈ کی کار پارکنگ میں اپنی کار میں سوار تھے جب ایک گاڑی نے انہیں ٹکر ماری جس کے نتیجے میں کلاشنکوف رائفل سے فائرنگ سے ڈرائیور اور سامنے والا مسافر ہلاک ہو گئے۔

پولیس کے مطابق فائرنگ سے تین دیگر افراد زخمی بھی ہوئے ہیں۔

کار میں سوار تینوں افراد جنوبی شہر تولون کے آس پاس کے علاقے میں منشیات کے کاروبار اور تشدد میں ملوث ہونے کے الزام میں پولیس کو مطلوب تھے۔

فائرنگ کا یہ واقعہ مقامی وقت کے مطابق رات 11 بجے مارسیل کے 16 ویں ضلع میں پیش آیا جو فرانس کے دوسرے سب سے بڑے شہر کے غریب ترین علاقوں میں سے ایک ہے۔

پولیس جرائم پیشہ گروہ کے حصے کے طور پر قتل اور اقدام قتل کی تحقیقات کر رہی ہے۔

زخمیوں میں سے ایک 29 سالہ نوجوان کے سینے میں گولیاں لگنے سے اس کی جان کو خطرہ لاحق ہے جبکہ ایک خاتون کا انگوٹھا ٹوٹ گیا ہے۔

پولیس کو جائے وقوعہ سے کلاشنکوف رائفلز میں استعمال ہونے والے 7.62 ملی میٹر گولیوں کے خول ملے ہیں۔

استغاثہ کا کہنا ہے کہ حملے کی جگہ کے قریب ایک گاڑی جلی ہوئی ملی ہے جو ممکنہ طور پر حملہ آوروں کی ہو سکتی ہے۔

رپورٹس کے مطابق صرف اس سال کے دوران مارسیل میں ہونے والے تشدد میں 45 سے زیادہ افراد ہلاک ہو چکے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں